Пас аз сохта ва ба истифода додани роҳҳо ва ё иншооте, мақомот аз “бо сифат ва стандарт” сохта шудани он мегӯянд, вале сокинон бесафатии онро фош месозанд.
Расонаҳои давлатии Тоҷикистон хабар доданд, ки раисҷумҳур Эмомалӣ Раҳмон рӯзи панҷшанбе, қитъаи нави шоҳроҳи байналмилалии Душанбе–Кӯлоб–Дарвоз–Хоруғ–Мурғоб–Қулма, ки Тоҷикистонро бо Ҷумҳурии Мардумии Чин мепайвандад, мавриди баҳрабардорӣ қарор дод.
Қисмати ифтитоҳшуда 3,7 километр роҳи навсозишуда, нақби муҳофизатии 550-метра аз тарма ва пули мошингарди 82-метра дар деҳаи Барсеми ҷамоати Сучони ноҳияи Шуғнони Вилояти Мухтори Кӯҳистони Бадахшонро дар бар мегирад.
Ба иттилои мақомот, сохтмони иншоотҳо бо истифода аз технологияҳои муосир ва дар шароити душвори кӯҳӣ, бо дастгирии Ҳукумати Тоҷикистон ва шарикони байналмилалӣ амалӣ шудааст. Ҳадафи ин тарҳ беҳтар сохтани роҳҳо ва таъмини нақлиёт барои расидан ба минтақаҳои дурдаст дар тамоми фаслҳои сол мебошад.
Бо вуҷуди ин, чанде пеш дар шабакаҳои иҷтимоӣ наворе паҳн гардид, ки дар он як сокини маҳаллӣ аз сифати пасти роҳ ва таъмири ғайристандартии қисматҳои муайяни шоҳроҳ изҳори нигаронӣ мекард. Дар навор дида мешуд, ки баъзе қитъаҳои роҳ пас аз боришоти пуршиддат осеб дидаанд. Ин навор баҳси густардаеро дар миёни истифодабарандагон ба бор овард.
Мақомот баъдтар изҳор доштанд, ки қитъаи зикршуда дубора асфалтпӯшӣ шудааст ва корҳои иловагии таъмирӣ барои беҳтар намудани сифати роҳ амалӣ гардидаанд.
