Субҳи рӯзи 25-уми октябр Вазорати беҳдошти Фаластин омори қурбониён ва хасороти ҳамлаҳои мушакии Исроил ба Ғаззаро нашр кард.
Дар охирин омори ин ниҳод омада, ки шумори кушташудагони ҳамлаҳои Исроил ба Фаластин аз 7-уми октябр то кунун ба 6504 нафар (6400 нафар дар Ғазза ва 104 нафар дар Каронаи Бохтарӣ) расида, ҳудуди 19 ҳазор нафар захмӣ шудааст.
Мувафиқи омори Вазорати беҳдошти Фаластин, 70% кушташудагонро кӯдакону занон ташкил медиҳанд. Ва танҳо беш аз 2500 нафарашон кӯдакони ноболиғ ҳастанд.
Дар ин омор гуфта мешавад, ки то кунун 260 нафар аз пизишкон кушта ва захмӣ шудаанд, 12 иншооти тандурустӣ аз фаъолият бозмонда, ба зудӣ ду се беморхонаи дигар ҳам ба сабаби ба охир расидани захоир ва лавозими тиббӣ пурра муъттал хоҳанд шуд.
Ҳамчунин қайд гардида, ки то кунун 45% хона ва биноҳои баландошёнаи истиқоматӣ дар Ғазза ба шакли комил ва ё ҷузъӣ хароб шудаанд.
Бо вуҷуди нишастҳои мукаррари кишварҳои арабӣ ва ғарбӣ дар қазияи даргириҳои Фластину Исроил ва талаби таваққафи ҷанг, ҳамоно ҳамлаҳо идома доранд. Исроил ва ҳампаймононаш ҳамлаи ҲАМОС ба ин кишварро маҳкум карда, мегӯянд, ки ин кишвар ҳаққи дифоъ аз худро дорад, зеро дар ин ҳамла беш аз 1400 шаҳрвандаш ба дасти ҲАМОС кушта шуда, наздики 200 нафари дигар асир афтодаанд.
Аммо ҷонибдорони мардуми Фаластин агарчи ҳамлаи ҲАМОС ба Исроилро маҳкум мекунанд, аммо мегӯянд, дифоъ аз худ далил намешавад, ки Исроил беморхонаҳо ва мардуми оддӣ ва кӯдаконро бомборон кунаду аз онҳо обу барқ ва ворид шудани кумакҳои инсониро боз дорад.
