Комиссари олии Созмони Милали Муттаҳид дар умури ҳуқуқи башар аз вазъи бади озодии баён дар Тоҷикистон интиқод кард.
Волкер Турк, Комиссари олии СММ дар умури ҳуқуқи башар дирӯз, 07-уми март зимни Иҷлосияи 52-юми ҳуқуқи башари ин созмон дар Женева баррасии вазъи ҳуқуқи инсон дар 40 кишвари ҷаҳонро ба миён гузошт.
Ӯ бо ибрози нигаронӣ гуфт: “Дар Тоҷикистон рӯзноманигорон ва блогнависони мустақил бо иттиҳоми терроризм ва ифротгароӣ ба муҳлати аз 7 то 21 соли зиндон маҳкум шудаанд, ки ин баёнгари саркӯби шадиди озодии баён дар ин кишвар мебошад.”
Ҷаноби Турк таъкид кард, ки мурофиаи додгоҳии ин рӯзноманигорон ба шакли пӯшида баргузор гардидааст, чун ба назар мерасад, ки дар мурофиаҳо ягон далели ҷиддии содир кардани ҷиноят пешниҳод нашудааст.
Ба гуфти Комиссари олии СММ, ин боздошту зиндонӣ карданҳо дар пайи шиддат гирифтани саркӯби озодии баён дар Тоҷикистон сурат гирифтааст.
Ин бори аввал нест, ки мақомоти Тоҷикистон аз минбари созмонҳои ҷаҳонӣ дар масъалаи поймолшавии ҳуқуқи инсон мавриди интиқод қарор мегирад.
Мақомоти кишвар чанд соли охир бо баҳонаи мубориза бо ифротгароӣ ва терроризм даҳҳо нафар аз фаъолон, рӯзноманигорон, ҳуқуқшиносон ва озодандешони тоҷикро боздошт ва бо иттиҳомоти сохта барои солҳои тӯлонӣ равонаи зиндон кардаанд.
Созмонҳои байналмилалии ҳомии ҳуқуқ чунин зиндониёнро бегуноҳ медонанд ва озодии онҳоро аз мақомоти Тоҷикистон талаб доранд, аммо мақомоти кишвар ҳамеша ин талаби созмонҳоро нодида мегирад.
