Комиссари Комиссияи Амрико дар умури озодиҳои мазҳабӣ бори дигар аз фишори мақомоти Тоҷикистон болои диндорон ва ҷорӣ кардани маҳдудиятҳои мазҳабӣ интиқод кард.
Муҳаммад Маҷид, комиссари Комиссияи Иёлоти Муттаҳидаи Амрико дар умури озодиҳои байналмилалии динӣ рӯзи 8-уми март бо интишори номае дар Твиттер ба муносибати Рӯзи байналмилалии модарон гуфт: "Дар Тоҷикистон занони ҳиҷобпӯш аз ҷониби пулис таъқиб мешаванд ва онҳоро намегузоранд ба биноҳои ҳукуматӣ ворид шаванад."
Ҳамчунин Муҳаммад Маҷид аз чунин бархурди мақомоти тоҷик сахт интиқод карда, мегӯяд: "Ҳукумати Тоҷикистон ҳатто барои мотамгирии занон барои мурдагон маҳдудият ҷорӣ карда, аз ҷумла пӯшидани либоси сиёҳ мамнӯъ аст."
Комиссари Комиссияи ИМА дар умури озодиҳои динӣ дар ҳоле аз вазъи ҳуқуқу озодиҳои мазҳабӣ дар Тоҷикистон интиқод мекунад, ки тибқи гузоришҳои солонаи ин созмон аз соли 2016 пайҳам Тоҷикистон шомили кишварҳои поймолкунандаи озодиҳои байналмилалии динӣ ва мазҳабӣ мешавад.
Ин созмон соли 2022 дар гузориши солонаи худ ба Департаменти Давлатӣ тавсия дод, ки 15 кишварро дар рӯйхати “кишварҳои мавриди нигаронии махсус” шомил кунад, ки Тоҷикистон низ ҷузъи ин 15 кишвар аст.
Ин кишварҳо иборатанд аз: Бирма, Чин, Эритрея, Эрон, Кореяи Шимолӣ, Покистон, Русия, Арабистони Саудӣ, Тоҷикистон, Туркманистон, Афғонистон, Ҳиндустон, Нигерия, Сурия ва Ветнам.
Дар гузориш гуфта мешуд, ҳукуматҳои ин кишварҳо ба “қонунвайронкуниҳои систематикӣ, давомдор ва дағалона” даст мезананд.
