Баъд аз сафари вазири корҳои хориҷии Русия ба шаҳри Душанбе ва музокироти сатҳи олии раҳбарони Тоҷикистон ва Русия қурби рубли русӣ дар баробари пули миллӣ-сомонӣ поён рафт.
Имрӯз, 7-уми июни соли 2023, Бонки миллии Тоҷикистон, ки ба сурати расмӣ ягона ниҳоди таъйинкунандаи қурби асъори хориҷӣ дониста мешавад, қурби пули миллӣ-сомониро дар баробари рубли русӣ боло бурдааст.
Тибқи ин арзишгузории ҷадиди Бонки миллӣ, дар ҳоли ҳозир қурби 1 рубли русӣ баробар бо 0,1335 сомонӣ таъйин шудааст. Бар ин асос, ҳангоми харид 1 ҳазор рубли русӣ баробар бо 133 сомонӣ ва 50 дирам арзиш дорад.
Ҳамин тартиб қурби 1 доллари амрикоӣ баробар ба 10,9131 сомонӣ, 1 евро баробар ба 11,6586 сомонӣ ва 1 юуани чинӣ баробар ба 1.5332 сомонӣ баҳогузорӣ шудаанд.
Аммо дар бонкҳои тиҷоратии кишвар, ки маъмулан ба муомилотӣ пулӣ машғул ҳастанд, дар вақти хариду фурӯши арзҳо аз муштариён ин рақамҳо фарқ мекунанд.
Гуфта мешавад, тайи як моҳи ахир ин бори чандум аст, ки Бонки миллӣ қурби пули миллӣ-сомониро дар баробари рубли русӣ боло мебарад, вале қурби сомонӣ дар баробари дигар арзҳои хориҷӣ ба мисли доллари амрикоӣ ва евро ҳамоно бетағйир боқӣ мондааст. Қурби рубли русӣ дар бозорҳои ҷаҳонӣ низ суқут карда ва ин поён рафтани он ба боло рафтани пули миллӣ-сомонии Тоҷикистон ҳам рабт дорад.
