Дар яке аз манотиқи осебдида аз заминларзаи дирӯз дар Сурия навзоде сиҳату саломат зери оворҳои ба ҷо монда аз ин ҳодиса ба дунё омад.
Намояндаи Созмони ҷаҳонии беҳдошт мегӯяд, эҳтимол меравад теъдоди қурбониёни ҳодисаи заминларзаҳои субҳи дирӯз дар ҷануби Туркия ва шимолу ғарби Сурия ба 20 ҳазор нафар бирасад.
Тибқи оморҳои расмӣ, ки то ҳол аз Сурия ва Туркия гузориш шудаанд, теъдоди қурбониёни заминларзаҳои субҳи дирӯз ба беш аз 5 ҳазор нафар расида ва бо гузашти вақт шумори қурбониёни ҷадид дар байни маҷруҳон ва зери оворҳо низ дар ҳоли афзоиш аст.
Аммо бо ин вуҷуд, баъзан хабару наворҳое низ аз ин манотиқи осебдида дар расонаҳо ва шабакаҳои иҷтмоӣ низ нашр мешавад, ки ҳанӯз ҳам шуълаҳои умедро барои наҷоти хеле аз омадҳои дигар, ки зери оворҳо мондаанд, зиёдтар кунад.
Дар байни ин ҳама хабару гузоришҳо наворе низ дар шабакаҳои иҷтимоӣ роҳ ёфтааст, ки нишон медиҳад, тифли навзоде зери оворҳо ба дунё омадааст ва яке аз афроди гуруҳи наҷот онро рӯи дастонаш гирифта ба самти ҳамкоронаш медавад, то аз сардӣ ва бараҳнагӣ наҷоташ диҳад. Аммо дар бораи модари кӯдак чизе нишон дода намешавад.
Дар ин навор дида мешавад, ки хонаҳои атроф ҳама вайрону валангору замингир шудаанд ва даҳҳо нафар ҳамроҳ бо наздикону пайвандони мардумони зарардида барои кумак он ҷо ҳузур доранд.
Наворҳои дигаре низ дар шабакаҳои иҷтимоӣ даст ба даст мешавад, ки дар онҳо дида мешавад, тифлони маъсуме бо синну соли мухталиф аз зери оворҳо зинда берун оварда мешаванд, вале дар бораи дигар афроди хонаводаи онҳо, ки зери оворҳо мондаанд, чизе нишон дода намешавад.
Инчунин яке аз ғамангезтарин лаҳзаҳо дар байни ин ҳама аксу наворҳо суратест, ки муаллифаш болои он навишта "охирин оғуши падару писар". Дар ин акс нишон дода мешавад, ки падару писар ҳарду бо ҳам оғуш карда, зери оворҳо ҷон бохтаанд.
Созмони ҷаҳонии беҳдошт тахмин карда, ки дар натиҷаи заминларзаҳои субҳи дирӯз ҳудуди 26 миллион нафар дар митақа зарар дидааст. Туркия дирӯз гуфта буд, ки беш аз 45 кишвари дунё омодагии худ барои кумакрасониро эълон кардаанд. Инчунин имконоти худи ин кишвар низ зиёд аст.
Аммо вазъият дар манотиқи осебдидаи Сурия хеле нигаронкунанда арзёбӣ мешавад, зеро ин кишвари ҷангзада, ки беш аз 12 сол инҷониб дар гирдоби ҷангу хурнеризиҳо қарор дорад, имконоти зиёде барои наҷоти мардумоне зери оворҳо надорад.
Аз як сӯй дар шабакаҳои иҷтимоӣ низ даҳҳо наворҳое чарх мезанад, ки мардумони зарардидаи Сурия аз ҷои ҳодиса аз ҷаҳониён кумак мехоҳанд ва фарёд мезананд, ки барои наҷоти наздикону пайвандонашон, ки то ҳол зери оворҳо нафас мекашанд, дасти кумак дароз кунанд.
Аммо аз сӯи дигар боридани барфу боронҳои пай дар пай низ дар ин минтақаҳо корҳои гурӯҳҳои наҷотро то рафт мушкилтар мекунад, вале бо ин вуҷуд инсонҳои ҳиматбаланде, ки ба кумак зарардидаҳо ба ҷойҳои ҳидаса рафтаанд бо вақт даст ба гирибон шуда, тамоми талошҳои худро мекунанд, то теъдоди зиёдтареро наҷот диҳанд.
Инчунин хеле аз хонаҳои маскунӣ дар ҳолати садамавӣ қарор доранд, бархе аз бошандагони ин минтақаҳо аз тарси он ки мабодо аз нав замин такон бихӯрад ва боқимонда хонаҳояшон низ хароб шаванд, намехоҳанд ба манзилҳои худ баргарданд.
Бо ин вуҷуд, қиссаҳои талху ширин аз ин ҳодисаҳои мудҳиш, ки ҳазорҳо нафарро дар Туркияву Сурия қурбон кард ва садҳо каси дигарро ба мотам шинонд, хеле зиёданд. Дар бораи шумори маҷруҳону зарардидаҳо ва аҳволи онҳо ҷои ҳарф гуфтан нест, чунки дарду ғами онҳо низ хеле зиёд аст.
Талх ба он хотир мегӯем, ки хеле аз мардумони маҳаллӣ ва сокинони ин кишварҳо азизонашонро аз даст додаанд ва ширин ба он хотир мегӯем, ки ҳанӯз ҳам шуълаҳои умеде дар дилҳо вуҷуд дорад, то гурӯҳҳои наҷот ҳазорҳо каси дигарро аз зери ин оворҳои ба ҷо монда аз заминҷунбиҳо зинда ва саломат берун бароранд...
Амруллоҳи Низом, махсус барои Azda tv
