Толибон рӯзи поёни ишғоли Амрико ва муттаҳидонашро дар майдони ҳавоии Багром, ки ба муддати 20 сол дар ихтиёри нерӯҳои хориҷӣ қарор дошт, ҷашн гирифтанд.
Бино ба иттилои хабаргузории “Бохтар“-и Афғонистон, имрӯз, 31-уми августи соли 2022, “мулло Муҳаммад Ҳасан Охунд, раисулвузарои Толибон дар барномаи таҷлил аз солрӯзи хуруҷи нирӯҳои хориҷӣ аз Афғонистон дар майдони ҳайвоии Багром гуфтааст, ки бо омадани Толибон қатлу бамборон поён ёфт ва дар тамоми кишвар амният таъмин шуд.”
Аммо бар хилофи гуфтаҳои Охунд, дар давоми як соли ахир дар манотиқи мухталифи Афғонистон даҳҳо таркиш, амалҳои маргталабона, аз он ҷумла дар Қундузу Мазор, Кобул ва Қандаҳору Ҷалолобод анҷом дода шуд, ки дар асари онҳо садҳо нафар кушта ва маҷруҳ гардиданд.
Дар бархе аксу наворҳое, ки аз рафти баргузории паради ҳарбии Толибон аз ин маросим дар расонаҳо роҳ ёфтааст, дида мешавад, ки садҳо нафар аз мотосиклсаворон, ки Толибон аз онҳо нерӯҳои “истишҳодӣ” (маргталаб) ном мебаранд, бо бардоштани парчами Аморати исломӣ қудратнамоӣ мекунанд.
Ба гуфтаи ББС, муовини вазири дохилии Толибон гуфтааст, ки интиҳориҳо (маргталабҳо) “ифтихор”-и Толибон ва “шуморашон ҷузви асрор”-и ин ҳаракат аст.
Аз сӯи дигар сафорати Русия дар Вошенгтон бо таъна задан ба тавонмандиҳои низомии ИМА ва муттаҳидонаш ҳам бо нашри як матлабе дар саҳфаи худ гуфтааст, ки Амрико бояд эътироф кунад, ки дар ҷанги 20-солаи худ дар Афғонистон дар муқобили Толибон шикаст хӯрдаанд.
Гуфта мешавад, нимашаби 30-уми августи соли 2021 генерал Крис Донаху, фармондеҳи дивизияи 82-юми ҳавоӣ, дар фурӯдгоҳи Кобул савори ҳавопаймои борбари С-17 гардида, Афғонистонро тарк карда буд.
Ҳамзамон Фармондеҳии марказии Амрико дар Ховари Миёна (CENTCOM) 31-уми августи соли гузашта низ бо нашри аксе аз генерал Донаху эълон карда буд, ки вай охирин сарбози амрикоӣ аст, ки Афғонистонро тарк кардааст.
Толибон пас аз 20 соли набард бо нерӯҳои амрикоӣ ва муттаҳидонаш дар Афғонистон 15-уми августи соли 2021 дубора дар Кобул сари қудрат омаданд ва идораи давлатро ба даст гирифтанд. Аммо бо гузашти зиёда аз як соли ҳукмронӣ то ҳол ҳеч давлате ҳукумати онҳоро расман эътироф накардааст.
