Дар вилояти Красноярски Русия қувваҳои махсуси ОМОН якҷо бо намояндагони ҳаракатҳои миллатгарои рус ҳангоми консерт бо мақсади гузаронидани рейд ногаҳон вориди толор шуданд.
Дар наворҳое, ки дар шабакаҳои иҷтимоӣ нашр шудаанд, дида мешавад, ки кормандони ҳифзи ҳуқуқ бо силоҳ вориди толоре шуда, базми муҳоҷирон аз Осиёи Марказиро барҳам мезананд.
Пас аз он, маъмурон асноди занону мардонро якто ба якто месанҷанд ва баъзе аз иштирокчиёнро аз толор мебароранд ва ба автобусҳо савор мекунанд. Дар умум 26 нафар шаҳрванди хориҷиро ба идораи пулис бурдаанд, ки 8 нафари онҳо дар Русия ғайриқонунӣ иқомат доштаанд.
Гуфта мешавад, шахсоне боздошт шудаанд, ки ҳуҷҷатҳояшон мушкил доштааст ё баъди гирифтани шаҳрвандии Русия худро ба қайди ҳарбӣ нагузоштаанд.
Бино ба навиштаи расонаҳои узбекӣ, ин рейд дар толоре гузаронида шудааст, ки овозхони шинохтаи узбек Ҷалолиддин Аҳмадалиев он ҷо консерт баргузор мекард ва дар ин консерт қариб 620 меҳмон ширкат дошта, 210 каси онҳо муҳоҷирони корӣ будаанд.
Дар пайи ин рейд, мақомоти Русия барои нақзи қоидаҳои муҳоҷират 19 парвандаи маъмурӣ боз карда, илова бар ин, бар асоси моддаи 322, қисми 3-и Кодекси ҷиноии Русия (бақайдгирии ғайриқонунии шаҳрванди хориҷӣ ё шахси бешаҳрванд) 3 парвандаи ҷониятӣ боз шудааст.
Қаблан чунин рейдҳо бештар дар хобгоҳҳо, қаҳвахонаву чойхонаҳо, бозорҳо ва ҳатто толорҳои варзишӣ гузаронида мешуданд, вале ин аввалин ҳолатест, ки дар вақти консерт ҳуҷҷати муҳоҷирон санҷидаву боздошт мешаванд.
