Мақомоти Тоҷикистон хонаи яке аз раҳбарони ғайрирасмии Вилояти Мухтори Кӯҳистон Бадахшон Толиб Аёмбековро дар шаҳри Хоруғ тахриб доранд. Дар ин бора “Pamirinside”, ки бештар ахбори ин вилоятро пӯшиш медиҳад, дар истинод ба манобеаш аз шаҳри Хоруғ хабар дод.
Бино ба иттилои манбаъ, ин хона, ки замини калон доштааст дар маҳаллаи Шошхоруғи шаҳри Хоруғ дар назди тарабхонаи “Марко-поло” буда, он аз ҷониби ҳукумат баъд аз боздошти Толиб Аёмбеков мусодира шудаааст.
Инчунин мақомот аз ин раҳбари ғайрирасмии Бадахшон, тарабхонаи “Алёш”, бино ва ҳудуди корхонаи “Хлебзавод”-ро мусодира кардааанд.
Ёдовар мешавем, ки мақомоти кишвар баъд аз саркӯби эътирози сокинон дар Хоруғ ва Рӯшон дар соли 2022 бо баҳонаи мубориза бо ҷинояткорӣ даҳҳо фаъолу чеҳраҳои шинохтаро дар ВМКБ боздошту зиндонӣ карданд.
Дар ин миён, мақомот полковники бознишастаи Идораи марзбонии Тоҷикистон Толиб Аёмбековро боздошт ва ба ҳукми абад маҳкум карданд.
Пас аз чанд рӯзи боздошти Толиб Аёмбеков маҳаллаи онҳо, ки ба номи Абдуламон Айёмбеков буд, ба номи шоир Ширин Бунёд иваз карда шуд.
Аз хонаводаи Аёмбековҳо Толиб ягона нафаре нест, ки боздошт мешавад, инчунин бародаронаш Оқил ва Аноятшо Айёмбековҳо ба муҳлати 30 солӣ ва бародарзодааш Мамадамон Аёмбеков барои 10 сол равонаи зиндон шудаанд.
Инчунин мақомот писарони Толиб Аёмбеков, Мамадалӣ Айёмбеков (соли 2019 дастгиру муҳокима шуда буд) дар умум ба 22 сол зиндон, Ғуломалӣ Абдураҳмонови 33-сола ба ҳукми абад ва Ҳасаналӣ Абдураҳмонови 25-соларо ба 12 соли зиндон маҳкум карда буд.
Охир аз ҳама мақомоти қудратии кишвар боз як бародари дигари Толиб Аёмбеков, Рашид Аёмбековро боздошт карда буданд. Ӯ охирин нафар аз бародарони Толиб буд, ки боздошт нашуда буд. То ҳол мақомот дар бораи ӯ чизе нагуфтаанд.
Наздиконашон боздошт ва ҳукмҳои сангини додгоҳро нисбати Аёмбековҳо дорои ангезаи сиёсӣ медонанд ва онро ба идомаи саркӯбҳои мақомоти тоҷик алайҳи мардуми Бадахшон рабт додаанд.
