Эмомалӣ Раҳмон бо судури чанд қарор муовини якум ва муовини вазири корҳои хориҷии Тоҷикистонро бо кадрҳои дигар аз нав таъйин кард.
Бино ба иттилои расмӣ, 5-уми январи соли 2024 Эмомалӣ Раҳмон, раиси Ҳукумати Тоҷикистон бо судури қароре Насриддин Исматуллоро ба вазифаи муовини якуми вазири корҳои хориҷии кишвар таъйин кард.
Насриддин Исматулло то замони ба ин вазифа таъйин шуданаш дар мақоми Сафири Фавқулодда ва Мухтори Ҷумҳурии Тоҷикистон дар Ҷумҳурии Исломии Покистон ва ҳамзамон дар Бангладеш ифои вазифа мекард. Эмомалӣ Раҳмон бо сабаби ба кори дигар гузаштанаш ӯро аз мақоми сафирӣ озод карда буд.
Инчунин раиси Ҳукумати Тоҷикистон бо судури як қарори дигар Шарифзода Фаррух Ҳомиддинро ба вазифаи муовини вазири корҳои хориҷии Ҷумҳурии Тоҷикистон таъйин карда аст. Фаррух Шарифзода аз соли 2017 то 31-уми майи соли 2023 Сафири Фавқулъода ва Мухтори Тоҷикистон дар Туркманистон буд.
Фаррух Шарифзода, писари собиқ вазири корҳои дохилии Тоҷикистон марҳум Ҳумдин Шарипов аст. Марҳум Хумдин Шарипов яке аз наздикони Эмомалӣ Раҳмон дар ҳукумат буд.
Гуфта мешавад, дар сохтори Вазорати корҳои хориҷии Тоҷикистон бар иловаи мақоми муовини якум, 4 мақоми муовинати дигар ҳам вуҷуд дорад. Дар чанд вақти ахир вазири корҳои хориҷии Тоҷикистон танҳо ду муовин дошт, яке Имомӣ Содиқ Ашурбойзода ва Фарҳод Салим буданд ва се мақоми дигар, аз ҷумла мақоми муовини якум холӣ буданд.
