Тоҷикистон

Таъсиси Таҳрики Толибони Тоҷикистон дар Афғонистон

Бархе расонаҳои мансуб ба Тоҷикистону Афғонистон аз таъсиси Таҳрики Толибони Тоҷикистон (ТТТ) дар Бадахшон хабар медиҳанд.

Акс аз манбаъҳои боз

Дар ин чанд рӯзи ахир бархе расонаҳои Тоҷикистон ва Афғонистон дар истинод ба як матлаби "Long war journal"-и амрикоӣ ва мақомоти Тоҷикистон ба бузургнамоӣ кардани Муҳаммад Шарифов, маъруф ба Маҳдӣ Арсалон пардохтаанд.

Ба қавли ин расонаҳо, Маҳдӣ Арсалон, ки ӯро бунёдгузори "Таҳрики Толибони Тоҷикистон" дар Афғонистон муаррифӣ мекунанд, ба як "таҳдиди бузурге" барои Тоҷикистон табдил шудааст. Аммо бархе аз огоҳони умур ин таъкиди онҳоро рад карда, мегӯянд, ки "Маҳдӣ Арсалонро расонаҳои амрикоӣ бузургнамоӣ ва фарбеҳсозӣ мекунанд, то барои барномаҳои баъдӣ омода шавад."

Нигаронии мақомот

Аз сӯи дигар, 4-уми июли соли ҷорӣ Забеҳуллоҳи Муҷоҳид, сухнагӯи Толибон дар Афғонистон тибқи шеваи кори ниҳодҳои вобаста ба Ҳукумати Тоҷикистон бо расонаҳо амал карда, дар посух ба "Радиои Озодӣ" дар бораи нигарониҳои мақомоти Тоҷикистон дар ин хусус гуфта буд: "Ҷониби Тоҷикистон ҳар мавзуъ ва ҳар ташвише дорад, бо мо расмӣ суҳбат кунанд, иншоаллоҳ, қаноаташон фароҳам хоҳад шуд. Мо таҳдидҳоро рафъ мекунем."

Дар бархе аксу наворҳое, ки расонаҳо нашр кардаанд, дида мешавад, ки дар он сӯи Омӯ номи Маҳдӣ Арсалон дар рӯи сангҳо ва кӯҳпораҳо бо ҳарфҳои калон навишта шудааст, ва аз дохили Тоҷикистон ин ном ба вузӯҳ хонда мешавад.

Фосила байни Тоҷикистону Афғонистон дар бархе ноҳияҳои ҳаммарз 300-400 метрро ташкил медиҳад, ва ҳамин чиз мақомоти тоҷик ва марзбонони кишварро ба ташвиш овардааст. Вале сухангӯи Толибони Афғонистон гуфта, ки "дар кадом постгоҳ номе навишта шуда бошад, ба назари мо касе ҳаст, ки сӯистифода мекунад ё ташвишҳоеро ба бор меорад."

Фарбеҳсозӣ ё таблиғоти манфӣ

Аз ҷониби дигар, аксар расоноҳа ва корбароне, ки дар минтақа ба бозтоб ва бузургнамоӣ кардани ин хабар дар шабакаҳои иҷтимоӣ пардохтаанд, дар сафи онҳое қарор доранд, ки нисбат ба ҳукумати муваққати Толибон дар Афғонистон хушбин настанд ва Толибон ҳам борҳо онҳоро ба таблиғоти манфӣ алайҳи Аморати исломӣ муттаҳам кардаанд.

Муҳаммад Шарипов, маъруф ба Маҳдӣ Арсалон

Аммо суол ин аст, ки оё дар воқеъ вуҷуди исми ҳаккокӣ гардида ва ё набишта шудаи "Маҳдӣ Арсалон" барои мақомоти Тоҷикистон ва марзбонони кишварамон қобили ташвиш аст ё онҳо низ дар тими касоне сафороӣ кардаанд, ки "ба фарбеҳсозӣ ва бузургнамоӣ" кардани Муҳаммад Шарипов пардохтаанд?

Муҳаммад Шарипов, ки раҳбарии созмони "Ансоруллоҳи Тоҷикистон"-ро дар Афғонистон ба уҳда дорад, ҳудуди 250 нафар силоҳбадасти тоҷикистониро дар атрофи худ дорад ва ин созмон дар муддати 25 соли фаъолияташ ҳеч гоҳ амалиётҳои густурдаи давомдореро, ки дар замон дар чанд гӯшаи Тоҷикистон роҳандозӣ шуда бошанд, барои ғасби қудрат дар Тоҷикистон анҷом надодааст.

Маҳдӣ Арсалон кист?

Маҳдӣ Арсалон-Муҳаммад Шарипови 27-сола, дар асл сокини деҳаи Шербегиёни ҷамоати Сафедчашмаи ноҳияи Нуробод, собиқ Комсомолобод дар шарқи Тоҷикистон аст. Мақомот ӯро ба узвият дар ҷамоати "Ансоруллоҳи Тоҷикистон" муттаҳам карда, дар пайгард қарор дода буданд ва то ҳол дар ҷусҷӯ қарор дорад.

Падари ӯ, Мирхоҷа Шарипов, дӯст ва қудои Амриддин Табаров, маъруф ба домулло Амриддин, муассиси гурӯҳи "Ансоруллоҳи Тоҷикистон" дар Афғонистон буд. Яке аз духтарони Мирхоҷа Шарипов бо яке аз писарони домулло Амриддин издивоҷ карда буд.

Акс аз сомонаи Радиои Озодӣ

Инчунин дар ин ду даҳаи гузашта, мақомоти Тоҷикистон дар дохили кишвар ва хориҷ аз он бо кумаки мақомоти дигар кишварҳо даҳҳо нафар аз наздикону пайвандони ин хонаводаҳоро низ бо иттиҳоми узвият дар ин созмон боздошт ва барои муддатҳои тӯлонӣ равонаи зиндон карда буданд.

Ҳамзамон мақомоти Тоҷикистон болои ин ду хонавода ва наздикону пайвандони онҳо фишорҳои зиёде ворид карда, чандин амлиёти низомӣ ҳам алайҳи онҳо анҷом дода буданд. Барои мисол, Дар натиҷаи яке аз он амалиётҳо мавсум ба "амалиёт бар зидди дастаи мулло Абдулло" даҳҳо нафар аз аъзои ин ду хонавода ва наздикону пайвандонашон, аз он ҷумла падари Маҳдӣ Арсалон ва як бародараш ҳам дар соли 2011 дар водии Рашт кушта шуданд.

Интихоби душвор

Баъд аз куштани Мирхоҷа Шарипов ва ҳамроҳонаш ҳалқаи фишори мақомот болои ин хонаводаҳо дар Тоҷикистон то рафт тангтар шуд ва тайи солҳои 2012-2015 шиддати пароканда шудани наздикону пайвандони онҳо дар Тоҷикистон зиёдтар гардид.

Дар ин раванд, қисме аз бузургсолони онҳо аз тарс ҳамроҳ бо зану фарзандонашон Тоҷикистонро тарк карда, аввал ба Русия ва сипас ба дигар кишварҳо панаҳ бурданд. Аммо як гурӯҳе ҳам аз фарзандони онҳо, ба хусус писарони насли аввали бунёдгузорони ҷамоати "Ансоруллоҳи Тоҷикистон", аз он ҷумла Маҳдӣ Арсалон ҳам роҳи падарони худро интихоб карда, ба Афғонистон рафта, силоҳро интихоб карданд.

Дар замони ҳукмронии Ҳомид Карзай ва Ашраф Ғанӣ панаҳгоҳи онҳо дар Афғонистон ғайрирасмӣ буд ва аксаран дар манотиқе ҳузур доштанд, ки зери нуфӯзи Толибон буд ва ҳангоме, ки ҳузури Толибон дар шимоли Афғонистон густариш пайдо кард ва пас аз он вақте дар 15-уми августи соли 2021 Аморати исломӣ пас 20 сол дубора сари қудрат омад, бузургнамоии ҷамоати "Ансоруллоҳи Тоҷикистон" ҳам дар расонаҳо бештар шуд.

Ҷамоати Ансоруллоҳи Тоҷикистон

Гуфта мешавад, ҷамоати "Ансоруллоҳи Тоҷикитон" бо раҳбарии Амриддин Табаров, маъруф ба домулло Амриддин дар соли 1997 пас аз имзои "Созишномаи истиқрори сулҳ ва ризоияти миллӣ дар Тоҷикистон" таъсис дода шуд.

Бунёдгузорони "Ансоруллоҳи Тоҷикитон" дар вақти таъсиси ин созмон дар соли 1997 муътақид буданд, ки имзои созишномаи сулҳи тоҷикон хилофи арзишҳои исломӣ ва як навъ фиреб барои халъи силоҳ ва сипас саркӯб кардани нерӯҳои Иттиҳоди мухолифини тоҷик аст. Ба ҳамин хотир, сафи худро аз Иттиҳоди нерӯҳои мухолифини тоҷик ҷудо карда, сулҳро напизурфтанд.

Аз нигоҳи эътиқодӣ ҳам ин ҷамоат ба "ҷамоати такфириҳо" ҳанӯз дар солҳои 2000 ном бароварда буд. Ҳатто раҳбарияти ҲНИТ-ро ҳам бо сабаби сулҳ кардан ва канор омадан бо "ҳукумати коммунистӣ"-и Эмомалӣ Раҳмон маҳкум ба куфр карда буданд. Шояд ба ҳамин хотир буд, ки ҲНИТ дар вақтҳои саркӯб кардани онҳо тавассути мақомот бо сукуташ "саҳмгузорӣ" кард, вале боре ҳам аланан аз он ҳимоят накард.

Амруллоҳи НИЗОМ, махсус барои Аздо тв

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp, Viber ва Imo ба ин рақам:

Матолиби дигари Тоҷикистон

Тоҷикистон

Кӣ рост мегӯяд: Эмомалӣ Раҳмон ё Владимир Путин?

Вокуниши ПМТ ба иттиҳомоти ҷониби Қирғизистон

Тоҷикистон

Мулоқоти Эмомалӣ Раҳмон бо вазири корҳои хориҷаи Саудӣ

Тоҷикистон

Оғози мурофиаи додгоҳии журналист Абдуллоҳи Ғурбатӣ