Ташкилоти амонатии қарзи хурди “Ҳумо” аз Бонки аврупоии таҷдид ва рушд барои ҷалби 240 зан ба курсҳои омӯзиши компютерӣ дар Тоҷикистон 2 миллон доллари амрикоӣ талаб кардааст.
Ба гузориши АМИТ “Ховар” БАТР ба ин дархост мувофиқат намуда, маблағро ҳамчун қарз пешниҳод хоҳад кард.
Гуфта мешавад, ҷалби 2 миллион доллари қарз аз БАТР барои гузарондани курсҳои омӯзиши компютерӣ ба 240 зан дар назар гирифта шудааст, ки ин курсҳо метавонанд ба занҳо кумак кунанд “малакаи технологияиҳои иттилоотиро дар бахши бозаргонӣ дасрас намоянд ва қобилияти касбияшонро беҳтар созанд.”
Барои амалии ин лоиҳа Ташкилоти қарзии хурди “Ҳумо” муваззаф аст, ки бо як мактаби касбии маҳаллӣ ҳамоҳанг карда, курсҳои омӯзиши компютериро барои занҳо ба роҳ монад.
Дар хабар гуфта нашудааст, ки ин бо ин маблағ ба ҷуз гузарондани курсҳои омӯзиши компютери барои занҳо боз чӣ лоиҳае дар назар аст. Ин аст, ки ба назари баъзе коршиносон, маблағи 2 миллон доллари амрикоӣ танҳо барои гузарондани курсҳои омӯзиши компютерӣ ва он ҳам барои 240 нафар хеле маблағи зиёд аст. Вале маълум нест боз он дар кадом лоиҳаи расмӣ ва шаффоф масраф мешавад.
