Додситон аз додрас ба рӯзноманигори шинохтаи тоҷик Завқибек Саидаминӣ 7,5 соли зиндонро талаб кардааст.
Радиои Озодӣ дар истинод ба манобеи огоҳ аз тафтишот хабар медиҳад, ки имрӯз, 3-юми ноябр мурофиаи навбатии ин рӯзномагори боздоштшуда дар Боздоштгоҳи мувақатии шаҳри Душанбе баргузор гардид. Ба фарқ аз мурофиаи гузашта ба модару бародар ва ҳамсари Завқибек Саидаминӣ иҷозаи иштирок дар муҳокимаро додаанд.
Ба иттилои манбаъ, дар ин мурофиа додситон аз додрас талаб кардааст, ки Завқибек Саидаминӣ барои 7,5 сол аз озодӣ маҳрум карда шавад. Худи рӯзноманигор ҳама иттиҳомоти нисбаташ эълоншударо рад кардааст.
“Завқибек Саидаминӣ гуфт, ба ягон ҳизбу ҳаракат ҳамкорӣ надошт. Баръакс, аз барномаҳояш дар телевизиони давлатӣ ёд овард, ки ҳатто аз ҷиҳодиён дар Сурия таҳдид гирифта буд. Ҳарду тараф сухани охирини худро гуфтанд. Додрас ба хонаи машваратӣ рафт,” – гуфтааст ҳамсуҳбати Радиои Озодӣ.
Пештар додситон барои Абдуллоҳ Ғурбатӣ 8 соли зиндон ва барои Далери Имомалӣ 10,5 соли зиндон талаб карда буд ва додрас танҳо 6 моҳӣ аз ҳукми онҳоро кам карда буд. Ба эҳтимоли зиёд аз талаби додситон нисбати Саидаминӣ танҳо 6 моҳ кам карда мешавад.
Завқибек Саидаминӣ, ки бо суҳбатҳояш дар шабакаҳои иҷтимоӣ бештар аз мушкилоти мардум мегуфт, 8-уми июли соли ҷорӣ аз ҷониби кормандони Раёсати мубориза бо ҷиноятҳои созмонёфтаи ВКД дар шаҳри Ваҳдат боздошт шуд. Дере нагузашта мақомот эълон кард, ки ӯ ба ҳамкорӣ бо ҲНИТ ва “Гурӯҳи 24” гумонбар аст.
Мақомот дар ҳоле ин рӯзноманигорро дар ҳамкорӣ бо гурӯҳҳои мухолифин айбдор мекунад, ки пас аз боздошташ ҳам ҲНИТ ва ҳам “Гурӯҳи 24” эълон карданд, ки бо ӯ ҳеч робитае надоранд ва ҳечгоҳ узви ин гурӯҳҳои мухолиф набуд.
Мақомоти Тоҷикистон дар пайи як амалиёти махсус тобистони соли ҷорӣ чанд рӯзноманигор, аз ҷумла Абдуллоҳ Ғурбатӣ (7.5 соли зиндон), Далери Имомалӣ (10 соли зиндон), Абдусаттор Пирмуҳаммадзода, Завқибек Саидаминӣ, Муҳаммади Султон (7 соли зиндон) Улфатхоним Мамадшоева ва чанд нафари дигарро боздошт карданд.
Боздошти ин рӯзноманигорони тоҷикро созмонҳои ҳуқуқӣ ва ҳимояи рӯзноманигорон маҳкум карда, борҳо озодии бечуну чарои онҳоро аз Ҳукумати Тоҷикистон талаб карданд, вале мақомоти тоҷик мисли ҳамеша ин дархостҳоро нодида гирифт.
