Ҳукумати вилояти Суғд бо нашри чанд акс аз ҷойи муноқиша, аз созмонҳои байналмилалӣ даъват намудааст, ки ба аксҳо нигоҳ карда, ҳодисаҳои ахирро баҳои воқеӣ диҳанд.
18-уми сентябри соли ҷорӣ, мақомоти вилояти Суғд бо нашри хабаре даргириҳои ахир дар марзро “ҳуҷуми таҷовузкоронаи низомиёни Ҷумҳурии Қирғизистон” хонда, гуфтааст, ки дар натиҷаи ин ҳамла дар Исфара иншооти гуногун, аз ҷумла манзили истиқоматии шаҳрвандон зарар дидаву хароб гардидааст.
Дар ин хабар гуфта мешавад, ки мақомоти марбута барои муайянсозии хисорот гурӯҳи корӣ ташкил намуда, теъдоди иншоот ва манзилҳои истиқоматии зарардидаро дақиқ мекунад.
Ҳукумати вилояти Суғд мегӯяд, ки осори даргирӣ дар деҳаҳои наздимарзии Исфара баёнгари он аст, ки “қувваҳои низомии кишвари ҳамсоя аз тамоми намуди силоҳҳои вазнину оташфишони дар ихтиёрашон қарордошта деҳаҳои наздисарҳадии Тоҷикистон, иншооти мулкӣ ва хонаҳои истиқоматкунандагонро таҳти тирборон қарор додаву оташ задаанд”.
Мақомоти Тоҷикистон аз созмонҳои байналмилалӣ ва таҳлилгарону коршиносони сатҳи минтақавию ҷаҳонӣ даъват кардааст, ки “зери таъсири иғвою дасисаҳо ва дурӯғпарокании дастгоҳҳои таблиғотии кишвари ҳамсоя намонда, ҳодисаҳои ахирро бо чашми ҳақбин ва аз рӯи воқеият баҳогузорӣ намоянд”.
Ёдовар мешавем, ки рӯзҳои 14-17-уми сентябр дар марзи Тоҷикистон ва Қирғизистон муноқишаи мусаллаҳона рух дод, ки дар натиҷа аз ҳарду ҷониб даҳҳо нафар куштаву захмӣ гаштанд.
Дар ин ҳодиса ҳар ду ҷониб якдигарро ба оғози даргириҳои мусаллаҳона муттаҳам мекунанд.
