Бино ба гузориши “Азия-Плюс” имрӯз 16 июн раисони вилоятҳои Суғду Бодканд дар чорроҳаи ҷамоати Чоркӯҳи шаҳри Исфара гуфтушунид доир намуданд.
Дар ин мулоқот сари масъалаҳои муҳиме, ба монанди тақсими оби полезӣ дар Маркази обтақсимкунии “Головной” ва “Хоҷабақирғон”, сохтмони иншоот дар минтақаҳои баҳсии марзӣ, боздошти сокинону ҷорвои онҳо баҳсу баррасӣ сурат гирифта, ҷонибҳо дар ин масоил ба тавофуқ расиданд.
Сухангӯи раиси вилояти Суғд, Музаффар Юнусов дар мавриди ин мулоқот ба “Азия-Плюс” чунин гуфт:
“Фароҳам овардани шароити осоиштаи сокинонии марзии ду кишвар аз масъалаҳои асосӣ буд. Дар ҳалли мушкилоти оби полезӣ дар “Головной” ва “Хоҷабақирғон” мувофиқа ҳосил шуд, ки об аз руйи низоми мувофиқа шуда аз ҷониби Қирғизистон риоя ва ҷорӣ мешавад. Мувофиқа ҳосил шуд, ки дар минтақаҳои баҳсӣ ҳама гуна сохтмонҳо бе мувофиқаи ҷонибҳо иҷозат дода намешавад. Муаммоҳои боздошту нигоҳдоштани шаҳрвандон, гузаштани чорвои сокинон ба марз, ки давоми ду ҳафта ба миён омад аз ин баъд дар доираи ҳамдигарфаҳмӣ, саривақт дар сатҳи ноҳиявӣ баррасӣ шуда ҳаллу фасл шавад.”
Дар натиҷаи баҳсҳои ахир сохтани бино ва ё иншооти дигаре дар нуқтаҳои баҳсӣ аз ҷониби ҳайати музокиракунандаи ду кишвар боздошта шудааст. Сокинони марзии ду кишвар то анҷоми ҳалли мушкилот набояд дар чунин нуқтаҳо чизе бисозанд.
Чанде пеш ҷониби Қирғизистон иддао кард, ки марзбонони тоҷик то як километр дарунтар дар қаламрави Қирғизистон нуқтаи постбонӣ гузоштанд. Аммо Тоҷикистон мегӯяд, ин нуқта марзи Тоҷикистон аст. Баъд аз гуфтушунидҳо натиҷа ин шуд, ки дар нуқтаҳои доғ то аломатгузорӣ шудан ду тараф аз ҳама иқдомот даст кашанд.
