Мухолифони тоҷик дар Олмон ба нишони эътироз аз қатли бераҳмонаи Қобилҷони 10-сола дар вилояти Маскав тазоҳурот гузаронданд.
Ин гирдиҳамоӣ бо ибтикори Ҳаракати сиёсии “Гурӯҳи 24” рӯзи 21-уми декабри соли ҷорӣ дар назди консулгарии Русия дар шаҳри Бонни Олмон баргузор гардид.
Дар он даҳҳо фаъол, аз ҷумла аъзои Ҳизби наҳзати исломии Тоҷикистон ва фарзандони мухолифон низ ҳузур доштанд ва шиорҳое мисли “То кай таҳқиру куштор ба хотири нажоду миллат идома меёбанд?”, “Русия — давлати таҷовузкор аст, ки бар пояи фашизм ва зӯроварӣ бунёд шудааст”, “Мо таҳқиқоти одилона ва мустақили қатли Қобилҷонро талаб мекунем”, “Ҳар як кӯдак ба зиндагӣ, шаъну шараф ва амният ҳақ дорад”, “Ҳеҷ як кӯдак набояд қурбонии нафрат ва нажодпарастӣ гардад” ва ғайра садо медоданд.
Тазоҳургарон акси Қобилҷон Алиев ва аксҳои чанд тифли дигар, аз ҷумла Хуршеда Султонова, Нилуфар Сангинбоева, Умарали Назаров, Далер Бобиев ва Ҳувайдо Тиллозодаро, ки дар гузашта дар Русия кушта шуда ва ё фавтида буданд, дар даст доштанд.
Инчунин дар плакате акси Александр Дугин, аз идеологҳои асосии Кремл, Сергей Миронов, вакили Думаи давлатӣ, Александр Бастрикин, раиси Кумитаи тафтишотӣ, Владимир Колоколтсев, вазири умури дохилии Русия ва Леонид Слутский, раиси Ҳизби либерал-демократӣ дида мешуд. Ин афрод бо баёнияҳову бадгӯиҳояшон дар бораи муҳоҷирон шинохта шудаанд ва мухолифон низ онҳоро раҳбарону пешвоёни миллатгароёни рус номидаанд.
Дар баёнияе, ки ташкилкунандагони ин тазоҳурот онро дар назди консулгарии Русия дар Олмон қироат карданд, аз мақомоти Тоҷикистон хоста шудааст, ки афроди дар боло зикршударо, ки ба барангехтани адовати байни миллатҳо ва таҳқири шаъну шарафи муҳоҷирон машғуланд, афроди номатлуб эълон кунад ва ба Тоҷикистон роҳ дода нашаванд.
Ҳамчунин мухолифон аз ҳукумати Тоҷикистон талаб карданд, ки сарбозони пойгоҳи 201-уми Русияро аз кишвар берун карда, аслиҳаву зербунёдҳои пойгоҳро барои Тоҷикистон бигузоранд.
Дар ин баёния нуқтаҳои дигаре низ, мисли талаби бекор кардани созишнома дар бораи шаҳрвандии дугона байни Тоҷикистон ва Русия, ба ихтиёри Тоҷикистон гузоштани маҷмааи оптикӣ-электронии “Окно”, ки дар шаҳри Норак ҷойгир аст ва баргардондани хобгоҳҳои донишҷӯёни Донишгоҳи тиббии Тоҷикистон, ки ғайриқонунӣ аз ҷониби сафорати Русия тасарруф шудааст, омадааст.
Гуфта мешавад, касе аз намояндагони консулгарии Русия ба назди тазоҳургарон омада ва суҳбат накардааст.
Бояд гуфт, ин аввали тазоҳуроте аст, ки аз ҷониби шаҳрвандони Тоҷикистон дар хориҷ аз кишвар пас аз қатли бераҳмонаи Қобилҷони 10-сола баргузор мешавад.
