Ҷамъе аз олмониҳо аз ҳукумати ин кишвар хостанд, ки паноҳҷӯи тоҷик Абдуллоҳи Шамсиддинро ба Тоҷикистон ихроҷ накунанд, зеро шиканҷаву зиндон ӯро таҳдид мекунад.
17-уми декабри соли 2022 ҷамъе аз ҳамкорон ва дӯстону наздкони олмонии паноҳҷӯи тоҷик ва фаъоли ҷомеаи маданӣ Абдуллоҳи Шамсиддин бо баргузории як тазоҳурот дар шаҳри Дортмунд аз мақомоти Олмон хостанд, ки ӯро ихроҷ накунанд.
Тазоҳуркунандагон дар даст шиору дархостҳои мухталифе доштанд, ки хулосаи тамоми онҳо ин буда, ки набояд паноҳҷӯи тоҷик Абдуллоҳи Шамсиддин ба Тоҷикистон фиристода шавад, зеро бо таваҷҷуҳ ба парвандаҳои дигар паноҳҷӯёни ихроҷшуда, маълум нест, ки ӯро чӣ сарнавиште интизор аст?
Дар ҷамъи ин эътирозгарон корфармои Абдуллоҳи Шамсиддин ҳам ҳузур дошта, бо садои баланд ва шиоре дар дасташ мегӯяд: “беҳтарин коригари моро ба қассобхона (яъне баТоҷикистон) нафиристед!“
Инчунин дар байни ин тазоҳуротгарон Шамсиддини Саид, падари Абдуллоҳ ҳам ҳузур доштааст. Ба қавли ӯ, ин тазоҳурот бо ибтикори худи олмониҳо ва дар раъси онҳо корфармо, ҳамкорон ва шиносҳои олмонии писараш қарор доштаанд.
Инчунин бархе олмониҳо бо нашри туморе дар Интернет аз дигар шаҳрвандони олмонӣ ва сокинони ин кишвар хостаанд, ки чун маълум нест, пас аз ихроҷ чӣ сарнавиште бар сари ин паноҳҷӯи тоҷик дар Тоҷикитон меояд, эътирози худро ба ин ҳукми додгоҳ ва қарор мақомот баён кунанд, то Абдуллоҳи Шамсиддин ихроҷ нашавад.
Гуфта мешавад, Абдуллоҳи Шамсиддин, паноҳҷӯи 32-солаи тоҷик дар Олмон аст, ки айни замон дар боздоштгоҳ қарор дорад ва мақомоти ин кишвар қасди ихроҷи ӯро ба Тоҷикистон доранд. Вай писари Шамсиддини Саид, яке аз аъзои аршади Ҳизби наҳзати исломии Тоҷикистон ва доронадаи мақоми паноҳангадии сиёсӣ дар Олмон мебошад.
