Мақомоти Тоҷикистон вазифадор шудаанд, ки ба сурати расмӣ барои бозори кори Русия 100 ҳазор муҳоҷир бифиристанд.
Вазорати меҳнат, муҳоҷират ва шуғли аҳолии Тоҷикистон мегӯяд, ки тибқи як созишномаи ҳукуматӣ қарор аст бар асоси талаботи бозорҳои кории Русия 100 ҳазор муҳоҷири корӣ омода карда, ба ин кишвар фиристад.
Ба қавли манбаъ, 19 уми июни соли 2023 Гулнора Ҳасанзода, вазири меҳнат, муҳоҷират ва шуғли аҳолии Тоҷикистон дар мулоқот бо ҳайати Федератсияи Русия таҳти роҳбарии муовини вазири меҳнат ва ҳифзи иҷтимоии Федератсияи Россия Мухтиярова Елена Вячеславовна суҳбат кардааст.
Дар рафти ин мулоқот ҷонибҳо дар бораи омода кардани муҳоҷирони корӣ пеш аз сафар карданашон суҳбат карда, таъкид кардаанд, ки то 100 ҳазор муҳоҷири корӣ дар муассисаҳои таҳсилоти ибтидоии касбӣ ва маркази таълими калонсолони Тоҷикистон мувофиқи талаботи бозори кори Русия омода карда мешаванд. Эҳтимол меравад дар ин муассисаҳо онҳо аз ҷониби худи корфармоёни Русия омӯзиши касбӣ бигиранд.
Гуфта мешавад, ба сурати расмӣ омода кардан ва ирсоли 100 ҳазор нерӯи кории Тоҷикистон ба бозорҳои кории Русия дар ҳолест, ки дар ин моҳҳои ахир аксари муҳоҷирони тоҷикистонӣ дар он кишвар аз ҷумлаи афроде ҳастанд, ки аз ҳама зиёд ҳуқуқу озодиҳояшон поймол мешавад.
Ирсоли ин теъдод нерӯи кории Тоҷикистон бар асоси талаботи “Созишнома байни Ҳукумати Ҷумҳурии Тоҷикистон ва Ҳукумати Федератсияи Русия дар бораи ҷалби муташаккилонаи шаҳрвандони Ҷумҳурии Тоҷикистон ба фаъолияти меҳнатии муваққатӣ дар қаламрави Федератсияи Русия” сурат мегирад.
Тоҷикистон зиёда 2 миллион муҳоҷир дар Русия дорад, ки як қисми онҳо муқим ва қисми зиёди дигари онҳо афроде ҳастанд, ки ба корҳои сахт ва камдаромад машғул ҳастанд ва мақомоти Русия ҳар вақте бихоҳанд аз онҳо ҳамчун абзори фишор болои мақомоти тоҷик ба нафъи худашон истифода мекунанд.