Ширкати барқи Афғонистон “Брешно” эълом кард, ки қарордоди воридоти барқи Тоҷикистон ба Афғонистон то поёни соли 2025 тамдид шуд.
Ин ширкат, ки ҳоло аз сӯи Толибон идора мешавад, рӯзи душанбе бо нашри иттилоияе мегӯяд, қарордод аз ҷониби раиси ширкати барқи Афғонистон “Брешно” Абдулборӣ Умар ва раиси ширкати “Барқи тоҷик” Асозода Муҳаммадумар имзо шудааст.
Дар иттилоияи ширкати “Брешно” ҷузъиёти бештаре дар бораи қарордод гуфта нашудааст, аммо ишора шуда, ки он дар Туркия ба имзо расидааст.
То кунун ширкати “Барқи тоҷик” ва дигар мақомоти Тоҷикистон дар ин маврид чизе нагуфтаанд.
Ин ҳам дар ҳолест, ки ширкати “Барқи тоҷик” солҳост наметавонад ниёзи мардуми Тоҷикистонро аз барқ бароварда кунад. Вале фурӯши онро ба хориҷ бидуни каму косте анҷом медиҳад. Ҳамасола дар фасли сармои зимистон барқ дар тамоми ҷумҳурӣ ва ҳатто дар пойтахт ҳам қатъ мешавад.
Чанд рӯзе қабл масъулони Нерӯгоҳи барқи обии “Сангтуда-1” хабар дода буданд, ки қарзи ширкати “Барқи тоҷик” аз ин нерӯгоҳ беш аз 3,5 миллард сомонӣ шудааст ва ин ширкат қодир нест қарзи худро пардохт кунад.
Ҳамзамон мақомоти Тоҷикистон нисбат ба дигар кишварҳои ҳамсоя бо Толибон чандон муносибати хубе надоранд, вале дида мешавад, ки муносибатҳои пасипардагии тиҷоратӣ ва иқтисодии ҳукумати Эмомалӣ Раҳмон бо Толибон идома дорад.
