Президенти Тоҷикистон дар суҳбат бо раисони бархе ноҳияҳои кишвар аз онҳо хостааст, ки дар бораи сокинони осебдида гузориш диҳанд.
Бино ба иттилои расмӣ, рӯзи 21-уми майи соли 2024 Эмомалӣ Раҳмон бо раисони вилоятҳои Суғду Хатлон ва бархе дигар ноҳияҳои кишвар суҳбати телефонӣ анҷом додааст.
Ба қавли Хадамоти матбуоти Президенти Тоҷикистон Эмомалӣ Раҳмон гузоришҳои раисони вилоятҳои Суғду Хатлон, роҳбарони ноҳияҳои Восеъ, Рашт, Нуробод ва Сангворро дар робита ба оқибатҳои боронҳои шадид ва селу обхезӣ шунида, барои “бартараф намудани паёмадҳои офатҳои табиӣ, аз ҷумла барқарор намудани роҳу пулҳои вайроншуда ва расондани кумакҳои зарурӣ ба мардум” супориш додааст.
Аммо супоришҳои Эмомалӣ ба зерадастонаш маълум нест, ки чиро дар бар мегиранд. Оё хонаҳои мардуми зарардида аз тарафи давлат сохта дода мешаванд ва ё танҳо роҳҳои вайроншуда таъмир мегарданду ҷӯйҳо тоза карда мешаванд. Вале сокинони осебдида мунтазири кумаки ҳукуматанд.
Гуфта мешавад, тайи солҳои гузашта, ҳукуматдорони кишвар барои мустаҳкам кардани соҳилҳо, селроҳаҳо ва дигар манотиқи осебпазири кишвар кумакҳои фаровонеро аз ҳисоби созмонҳои минтақавӣ ва ҷаҳонӣ дарёфт кардаанд.
Ҳамзамон борҳо баъзе донишмандони кишвар ва коршиносони хориҷӣ ба ҳукуматдорони кишвар маслиҳат додаанд, ки дар амри мустаҳкам кардани соҳилҳо, селроҳаҳо ва дигар манотиқе, ки аз ин нигоҳ осебпазир ҳасатанд, хеле ҷидди муносат карда, сари вақт чораандешӣ кунанд.
Аммо таҷриба нишон додааст, ки раҳбарияти кишвар ба гапи онҳо дуруст гӯш накарда, аксари он маблағҳоро бо изофанависиҳо ва беҳуда дар ҷойҳои дигар харҷ кардаанд. Ба ҳамин хотир, соли 2024 тибқи радабандиҳои ҷаҳонӣ Тоҷикистон дар бистгонаи кишварҳои фасодзадатарини давлатҳои дунё қарор гирифтааст.
