Размоишҳои байналмилалии “Бародарии шикастнопазир — 2025” дар Тоҷикистон оғоз меёбанд.
Аз 14-ум то 24-уми октябри соли 2025 дар машқгоҳи низомии “Фахробод” дар вилояти Хатлон машқҳои бузурги муштараки низомӣ бо иштироки кишварҳои узви Созмони Аҳдномаи амнияти дастҷамъӣ (СААД) ва Иттиҳоди Давлатҳои Мустақил (ИДМ) баргузор мешаванд.
Бинобар иттилои Вазорати мудофиаи Тоҷикистон, дар доираи ин тамринҳо се намуди размоиши асосӣ сурат мегирад: машқҳои сулҳҷӯёнаи “Бародарии шикастнопазир”, машқҳои махсус зери унвони “Монеа” барои ҳифзи радиатсионӣ, кимиёвӣ, биологӣ ва таъминоти тиббӣ ва инчунин машқҳои зиддитеррористӣ бо номи “Иттиҳоди зиддитеррористӣ” бо иштироки мақомоти салоҳиятдори кишварҳои узви ИДМ.
Тибқи барномаи ин размоиш, то 19-уми октябр низомиён аз кишварҳои узви СААД ба кишвар меоянд ва марҳилаи фаъоли машқҳо оғоз меёбад. Низомиёни Беларус ва Қирғизистон аз аввалинҳо шуда, барои иштирок дар ин размоиш вориди кишвар шудаанд.
Ба гуфтаи Вазорати мудофеи кишвар, дар ин размоишҳо қувваҳои мусаллаҳи Тоҷикистон, Русия, Қазоқистон, Беларус ва Қирғизистон ширкат меварзанд. Низомиён дар ҷараёни машқҳо ҳамоҳангсозии амалиётҳои муштарак, мубориза бо гурӯҳҳои террористӣ ва вокуниш ба таҳдидҳои муосири амниятиро таҷрибаомӯзӣ хоҳанд кард.
Ҳадафи баргузории ин машқҳо таҳкими ҳамкории низомии кишварҳои узви СААД ва боло бурдани омодагии ҷангии онҳо гуфта шудааст.
