Мақомоти Тоҷикистон мехоҳанд барномаи муҳоҷирати сокинони кишвар ба хориҷро густариш диҳанд.
Аз ҷумла, гуфта мешавад, ки мақомоти Тоҷикистон масъалаи диверсификатсия ё бисёрсамта кардани муҳоҷирати корӣ рӯй даст гирифтаанд ва дар робита ба ин масъала бо қарори Вазорати меҳнат, муҳоҷират ва шуғли аҳолии Тоҷикистон омӯзиши забони куриёӣ барои онҳое, ки мехоҳанд ҳамчун муҳоҷири корӣ ба ин кишвар сафар кунанд, роҳандозӣ мешавад.
Вазорати меҳнати кишвар иттилоъ дод, ки аз рӯзи 5-ум то 8-уми декабр ҳайате аз мақомоти корҳои хориҷӣ, адлия, вазорати шуғл, Хадамоти рушди захираҳои инсонӣ ва дигар масъулони Корея дар Душанбе бо мақомоти тоҷик мулоқоту гуфтугӯ карданд.
Гуфта мешавад, зимни мулоқот ҷонибҳо имкониятҳои омода намудани мутахассисонро барои кор дар Ҷумҳурии Кория мавриди баррасӣ қарор доданд.
Тоҷикистон талош дорад ба низоми иҷозати кор (EPS)-и Ҷумҳурии Корея ворид шавад. Вазорати меҳнати кишвар мегӯяд, “ин низом имкон медиҳад, шаҳрвандони Тоҷикистон дар Ҷумҳурии Корея дар асоси шартнома бо кор таъмин шаванд.”
Бо нашри ин хабар корбарон дар шабакаҳои иҷтимоии тоҷикӣ вокунишҳои зиёд карданд. Бархе мақомоти Тоҷикистонро ба он муттаҳам мекунанд, ки барои таъмини аҳолӣ ба ҷоӣ кор оҷиз мондааст ва талош мекунад сафи муҳоҷиронро ба хориҷи кишвар боз ҳам бештар кунад.