Аз меъёр зиёд нигоҳ доштани маҳкумшудаҳо дар зиндонҳои Тоҷикистон нигаронии мақомоти ҳифзи ҳуқуқро ба вуҷуд овардааст.
Ваколатдор оид ба ҳуқуқи инсон дар Тоҷикистон бо нашри як гузориш гуфтааст, ки айни замон дар зиндонҳои Тоҷикистон зиёда аз 15 ҳазор нафар маҳбус адои ҷазо мекунанд.
Ин омор дар ҳоле нашр мешаванд, ки то моҳи январи соли 2024 арзёбии мақомот дар хусуси шумораи зиндониён ҳудуди 13,5 ҳазор нафар буд. Ва ба гуфтаи Омбудсмени тоҷик бо зиёд шудани беш аз 1 ҳазору 500 нафари дигар ба теъдоди онҳо ваъи нигаронкунандаеро дар робита афзоиши зиндониҳо ба бор овардааст.
Пеш аз ин ҳам борҳо бархе сохторҳои дохилӣ ва ниҳодҳои байнулмилалӣ дар бораи аз меъёр зиёд будани теъдоди зиндониён дар маҳбасҳои Тоҷикистон изҳори нигаронӣ карда буданд. Ваколатдор оид ба ҳуқуқи инсон ҳам соли гузашта пас аз боздиди се муассисаи ислоҳии тобеи Вазорати адлия низ аз чунин вазъи асафбори зиндонҳо интиқод карда буд.
Дар ин гузориши Ваколатдор омадааст, ки соли 2024 15 ҳазору 600 маҳбус аз ташхиси вируси норасоии масъунияти бадан (ВНМО) гузаронда шуданд ва 30 нафар аз онҳо ба ин вирус мубтало будаанд. Ба гуфтаи мақомот, ин афрод қабл аз ворид шудан ба муассисаҳои ислоҳӣ ба ин беморӣ гирифтор буданд.
Гуфтанист, дар Тоҷикистон дар ҳоли ҳозир ба сурати расмӣ 19 муассисаи ислоҳӣ ва боздоштгоҳ фаъолият мекунанд. Мақомоти Тоҷикистон идао мекунанд, ки бисёре аз ин зиндонҳо таҷдид ва навсозӣ шудаанд ва шароити нигоҳдории маҳбусон наздик ба талаботи байналмилалӣ аст.
Аммо омбудсмени Тоҷикистон ин иддаои онҳоро рад карда, мегӯяд, ки бо вуҷуди аз ҳад зиёд нигаҳ доштани маҳбусон пушти миллаҳои зиндонҳо шароити санитариву маъишӣ ва тиббии маҳбасхонаҳои кишвар ба талоботи рӯз ҷавобгӯ намебошанд.
