Вазири корҳои хориҷии Британияи Кабир Дэвид Кэмерон 22-уми апрели соли ҷорӣ дар Душанбе бо раисҷумҳури Тоҷикистон Эмомалӣ Раҳмон мулоқот кард.
Тавре Дастгоҳи раёсатҷумҳурии Тоҷикистон хабар дод, қарор аст вазири корҳои хориҷии Британия аз кишварҳои Осиёи Марказӣ дидан кунад ва ӯ нахуст ба Тоҷикистон ташриф оварда, мулоқоти ӯ бо Раҳмон рӯзи душанбе дар Қасри миллат доир гашт.
Гуфта мешавад, дар ҷараёни мулоқот ҷонибҳо масоили ҳамкории Тоҷикистон ва Британияи Кабир, аз ҷумла муносибатҳои ду кишвар дар соҳаҳои сиёсӣ, иқтисодиву тиҷоратӣ, фарҳангӣ ва гуманитарӣ мавриди баррасӣ қарор дода шуд.
Дафтари матбуоти Президент мегӯяд, Эмомлаӣ Раҳмон бо Дэвид Кэмерон масъалаи муҳоҷирати кориро баррасӣ кардаанд. Аммо маълум нест дар ин робита Раҳмон ба намояндаи Британия чӣ пешниҳодҳо кардааст.
Низ гуфта мешавад, ки роҳандозии ҳамкории кишварҳо дар самти ҳалли мушкилоти обу иқлим ва инчунин “гуногунсозии хатсайрҳои ҳавопаймоӣ байни давлатҳо аз мавзуъҳои дигари мулоқоти имрӯза буд.”
Эмомалӣ Раҳмон ҳамчунин дар ин мулоқот сармоягузории Британияи Кабирро дар бахшҳои саноати кӯҳӣ, металлургӣ, сабук, хӯрокворӣ, дорусозӣ ва соҳаи кишоварзии Тоҷикистон зарур хондааст.
Дар хабар таъкид мешавад, ки ҷонибҳо масъалаи амну суботро низ баррасӣ намуда, дар робита ба рушди ҳамкорӣ дар самти тавлиди “энергияи сабз”, гузариш ба “иқтисоди сабз” ва татбиқи лоиҳаҳои вобаста ба пешбурди “иқтисоди рақамӣ” низ гуфтугӯ каданд.
