Тоҷикистон дар панҷ моҳи аввали соли ҷорӣ аз содироти нерӯи барқ ба дигар кишварҳо беш аз 26,7 миллион доллар даромад ба даст овардааст.
Тибқи оморҳои расмӣ, Тоҷикистон аз фурӯши нерӯи барқ дар моҳҳои январ-майи соли 2022 нисбат ба ҳамин давраи соли гузашта 10,2 % зиёд маблағ ба даст овардааст.
Дар моҳҳои январ-майи соли гузашта ба хориҷа ба маблағи беш аз 24,2 миллион доллар нерӯи барқ содирот шуда буд.
Тоҷикистон бештар нерӯи барқро ба Афғонистон ва Узбекистон содир мекунад.
Бино ба иттилои Вазорати энергетика ва захираҳои оби кишвар, аз аввали сол дар Тоҷикистон зиёда аз 8,4 миллиард кВт/соат нерӯи барқ истеҳсол шудааст, ки нисбат ба як соли пеш 3,5 дарсад зиёд мебошад.
Гуфта мешавад, зиёда аз 7,6 миллиард кВт/соати онро нерӯгоҳҳои барқи обии кишвар ва боқимонда 805 миллион кВт/соати нерӯи барқро маркази барқу гармидиҳӣ истеҳсол кардаанд.
