Вазири корҳои хориҷӣ мегӯяд, ки соли гузашта ба Тоҷикистон 350 ҳайати гуногунсатҳи кишварҳои хориҷӣ ва намояндагони созмонҳои байналмилалӣ ташриф оварданд.
Имрӯз, 17-уми феврали соли 2023, Сироҷиддин Муҳриддин, вазири корҳои хориҷии Тоҷикистон дар суҳбат бо хабарнигорон гуфт: “Дар ҳолати кунунӣ Тоҷикистон бо 183 давлат муносибатҳои дипломатӣ барқарор намудааст.”
Сироҷиддин Муҳриддин бар ин бовар аст, ки ҳамгироии киварҳои минтақа ба сӯи муттаҳид шудан хеле зиёд эҳсос шуд ва мисол меорад, ки дар қолаби ҳамкории С5+1 “машваратҳо дар доираи чунин қолабҳо бо Россия, Чин, Иттиҳоди Аврупо, ШМА, Ҷопон, Ҳиндустон, Корея, Шӯрои ҳамкории кишварҳои арабии Халиҷи Форс доир шуданд.”
Ба гуфтаи Вазири корҳои хориҷии Тоҷикистон “дар соли 2022 Тоҷикистон ҳаммуаллифи номинатсияҳои “Латифаҳои Хоҷа Насриддин” ва “Санъати абрешимбофӣ” гардид, ки ба феҳристи осори фарҳанги ғайримоддии ЮНЕСКО ворид шуданд.”
Гуфта мешавад, дар замони раҳбарии Сироҷиддин Муҳриддин нисбат ба дигар раҳбарони дастгоҳи дипломусии кишвар муносибатҳо ва робитаҳои Тоҷикистон дар сатҳи ҷаҳонӣ хеле пуррангтар шуд, вале дар ҳамин муддат муносибат бо кишварҳои ҳамсоя, ба хусус Қирғизистону Афғонистон хеле сард гардид. Марзҳои муштараки Тоҷикистон бо ин ҳамсоя ноором ва нигаронкунанда боқӣ мондааст.
