Дар муқоиса бо се моҳи аввали соли 2020 Тоҷикистон ҳаҷми интиколи барқро ба кишвари ҳамсоя дар ҳамин давраи соли ҷорӣ қариб ба андозаи 43 % зиёд кард.
Азия-Плюс бо такя ба Агентии омори назди раёсати ҷумҳурӣ навишта, ки давоми моҳҳои январ -март ба хориҷи кишвар 9 млн 719 ҳазор доллар барқ интиқол дода шудааст. Маблағ ба барқи интиқолёфта дар ҳамин давраи соли гузашта 6 млн 850 ҳазор долларро ташкил дода буд.
Қаблан зикр гардида буд, ки интиқоли барқ ба хориҷи кишвар дар мавсими тирамоҳу зимистон дар ҳаҷми начандон зиёд танҳо ба Афғонистон сурат мегирад.
Дар ҳамин ҳол худи Тоҷикистон оид ба истифодаи барқ маҳдудият (лимит) амал карда он расман аз 5 январ ҷорӣ шуд, ҳарчанд сокинони деҳот ҳанӯз аз моҳи сентябри соли гузашта аз зуд зуд ва ба муддати тӯлони қатъ гардидани барқ шикоят мекарданд.
Дар ҳоли ҳозир аҳолии деҳот рӯзона аз соати 5 субҳ то 23 шаб бо барқ таъмин карда мешаванд. Айни замон танҳо дар ҷойҳое, ки дар онҷо хонаҳои баландошёна ҷойгир ҳастанд нерӯи барқ шабонарӯзи интиқол меёбад.
Аввали ҳафта ширкати “Барқи тоҷик” гуфт, ки бо оғози моҳи мубораки Рамазон мардум субҳ ва шомгоҳон бо барқ таъмин карда мешаванд, то ки хӯрок таёр карда тавонанд.
Ширкати “Барқи тоҷик” пурра бартараф шудани реҷаи маҳдудияти истифодабарии барқро ба гармшавии ҳаво вобаста медонанд, ки ба афзоиши маҷрои об дар дарёҳо мусоидат мекунад, зеро 93 % барқ дар Тоҷикистон дар нерӯгоҳҳои барқӣ оби истеҳсол мешавад. Лекин дар мавриди комилан бекор кардани реҷаи маҳдудияти истифодабарии барқ (лимит) ҳоло дар ширкати “Барқи тоҷик” ҳечгуна тасмиме гирифта нашуда аст.
