Муҳоҷирони тоҷике, ки ба гумони қатли варзишгари рус дастгир шуданд

Бино ба хабарҳои расида, 6 муҳоҷири тоҷике, ки соли гузашта дар қатли як варзишгари рус гумонбар дониста дастгир шуда буданд, раванди тафтишоти парвандаашон ба поён расида, ба додгоҳ фиристода шудааст.

Вакили дифои яке аз боздоштшудагон гуфтааст, ки нисбати онҳо ба “авбошии гурӯҳӣ” парванда тартиб додаанд, қаблан гуфта мешуд, куштор ба маслиҳати пешакӣ анҷом шудааст.

Ҳамчунин вакили дифои муҳоҷирон ба Радиои Озодӣ гуфтааст: “ҳангоми тафтиши қазия моддаи таҳдид ба қатл ва дидаву дониста расондани зарари вазнин ба саломатӣ аз парванда берун карда шудааст.”

Гумонбарон тӯли як сол аст, ки дар боздоштгоҳ нигоҳдорӣ мешаванд ва аз ин нафарон, ки сокинони ноҳияи Масчоҳ мебошанд, Фаридун Сафаров, Рустам Аминов, Фирӯз Сафаров, Неъматҷон Бобоев, Мирзошавкат Туфалангов ва Меъроҷиддин Аловиддинзода – ном бурда мешаванд.

Бино ба гуфтаи Игор Кайдан, вакили мудофеи Неъматҷон Бобоев, додрас аз онҳо хостааст, рӯзи сешанбе ба мурофиа ҳозир шаванд. “Ду айб аз парвандаи ҷавонон гирифта шудааст. Се нафари онҳо, аз ҷумла шахси зери ҳимояи ман, Неъматҷон Бобоев, ба латукӯб муттаҳаманд, дигарон ба авбошии гуруҳӣ”.

Шаби 8-уми июни соли 2019  дар ҳудуди боғи Ландшафтнийи минтақаи Бутовои ҷанубии шаҳри Маскав Сергей Чуев, варзишгари рус, кушта шуда буд. Мақомоти Русия шаш муҳоҷири тоҷикро дастгир карда ва гуфтанд, "онҳо ба сару тани ҷабрдида осеб расониданд ва дар натиҷа ӯ ба об афтод. Дар ҳамон ҳолат ҳам латукӯби ӯро идома доданд ва дар натиҷа ӯ ғарқ шуд".

Додситонии Русия гуфта буд, шаҳрвандони Тоҷикистон "ба ҷабрдидаҳои дигар низ таҳдиди қатл карда, бо се нафари дигар ва як ноболиғ кирдорҳои хушунатомез анҷом доданд".

Падари Фаридун Сафаров, ки чанд вақт боз дар Руссия қарор дорад, дар хусуси лату кӯб шудани писараш дар боздоштгоҳ ба Радиои Озодӣ гуфтааст: “писарам иброз дошт, ки дар рӯзҳои аввали боздошт лату кӯб шудааст, вале баъдан чунин ҳолат бо вай рух надодааст.”

Ҷумъабой Сафаров, ба нақл аз писараш гуфтааст, “онҳо худро дар марги варзишгар Сергей Чуев худро гунаҳкор намешуморанд ва ба адолати додгоҳӣ умед доранд”.

Ин муҳоҷирон то боздошт гардиданашон дар як сохтмоне дар Федератсияи Русия кор мекарданд.

Дар моҳи июни соли 2019 дар робита ба марги мармузи варзишгари рус ин шаҳрвандони Тоҷикистон дар Русия ба таври таҳқиромез дур аз одобу ахлоқи инсонӣ боздошт гардида буданд, ки дар аксҳои интишоргардида дида мешуд, рӯяшон ба девор ва шимҳои даридаву танҳои нимурёнашон зоҳир буд, аз ҷониби ходимони полис гирифтаву дар Интернет нашр шуда буданд. Ин амалкарди мақомоти рус дар шабакаҳои иҷтимоӣ вокунишҳои зиёдеро ба бор оварда буд. Вале то ба имрӯз аз ҷониби мақомоти Русия, ки чунин амали ношоиста анҷом доданд, касе ба ҷавобгарӣ кашида нашудааст.

Ба гуфтаи  Игор Кайдан, вакили мудофеи яке аз гумонбарон, ходимони полиси ноҳияи Зюзинский дар ин кор даст доранд, "вале мақомот барои ба ҷавобгарӣ кашидани онҳо роҳ надоданд".

Ҳоло дар Русия зиёда аз як миллион муҳоҷирони тоҷик кору зиндагӣ мекунанд, ки ҳамеша аз ҷониби пулиси Русия мавриди азият ва боздоштҳои сохта қарор мегиранд, мақомоти Тоҷикистон ҳамеша ба хотири “шарики статегӣ”  буданашон хомуширо ихтиёр мекунанд, ҳомиёни ҳуқуқи муҳоҷирон боздоштҳоро саҳнасозӣ унвон мекунанд.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.