Дирӯз (14. 10. 2020) дар робита ба масдуд шудани суратҳисоби бонкии Озодаи Раҳмон раиси Дастгоҳи Президенти Тоҷикистон хабаре аз номи Раиси Бонки Фаронса, Франсиско Валерой де Галҳау нашр шуда буд, ки “Аздо тв” онро бознашр кард. Барои таҳқиқи хабар “Аздо тв” ба котиби матбуоти Президенти Тоҷикистон Абдуфаттаҳо Шарифзода ва ҳамчунин ба масъули бахши матбуотии Бонки Фаронса нома ирсол намуда буд.
Имрӯз 15 октябр Котиби матбуоти Президенти Тоҷикистон дар посух ба “Аздо тв” изҳори беиттилоӣ кард. Аммо дар баробари ин сухангӯӣ раиси Бонки Фаронса, хонуми Дебора Гедҷ дар посухи расмие ба “Аздо тв” навишт, ки “ин ҳисоби твиттерие, ки Шумо зикр кардед, ба раиси Бонки Фаронса тааллуқ надорад ва ҷаълӣ аст ва ӯ дар Твиттер умуман ҳисобе надорад”. Дар идома афзудааст, ки “мо ҳамеша чунин ҳисобҳои фейкиро гузориш мекунем, вале шабкаҳои иҷтимоӣ дар ҳазфи онҳо зуд вокуниш намекунанд. Масъулини марбутаи мо имрӯз ба Твиттер барои ҳазфи ин ҳисоби ҷаълӣ хоҳанд навишт”.
Дар пайи таҳқиқоти “Аздо тв” мушахас шуд, ки ҳисобе, ки бо номи раиси Бонки Фаронса, Франсиско Валерой де Галҳау дар Твиттер мавҷуд аст,
– ҳанӯз аз соли 2013 боз шуда, вале аз 31 август фаъол шудааст;
– ҳисоб ҳирфаӣ роҳандозӣ шудааст ва дар бахши маълумотҳои ин твиттер вебгоҳи расмии Бонки Фаронса зикр шудааст;
– инчунин твиттери расмии ин бонк низ оварда шудааст.
Ҳамаи ин баёнгари он аст, ки ин твиттер аз тарафи афроди ҳирфаӣ роҳандозӣ шуда, мақсади хоссеро дунбол мекунанд.
Барои муайян кардани сатҳи забони фаронсавии ин твиттер мо аз як коршиноси фаронсавӣ, ки устоди Донишгоҳ аст, назар хостем, ишон дар посух гуфт: “забони фаронсавии ин твиттер аҷиб аст ва ман баид медонам, ки раиси Банки Фаронса дар ин сатҳ, номафҳум ва ғалат бинависад”.
Ба назари коршинос, Муҳаммадҷон Кабиров ин тивиттер аз чанд нигоҳ ҷаълӣ ба назар мерасад: “Як нуктае, ки ин твиттеро зери шубҳа мебарад, ин нақлу интиқоли 5 миллиард доллар дар муддати як сол мебошад. Маъмулан кишварҳои худкома барои пулшӯӣ аз эҳтиёт кор мегиранд ва барои интиқоли пулҳояшон онҳо аз чандин ҳисоби бонкӣ истифода мекунанд. Бештар аз банкҳои кишварҳое истифода мекунанд, ки қаовнини сахтгиронае барои пулшӯӣ надоранд, аз қабили бонкҳои мавҷуд дар офшорҳо ва ё Кипр ва кишварҳои Балтик. Фаронса қавонини сахтгиронае дорад барои пулшӯӣ ва инчуни молиёти боло дар Фаронса боис шудааст, ки хеле аз милярдерҳо дороиҳояшонро аз Фаросна ба дигар кишварҳо интиқол диҳанд, ба вижа ба Суис (Швейцария) ё Пуртуғол (Партгалия)”.
