Камиссяи байналмилалии Амрико дар мавриди озодиҳои динӣ (USCIRF) мегӯяд, Тоҷикистон бо баҳонаи мубориза бр ифротагроӣ диндорони зиёдеро боздошт ва зиндонӣ мекунад.
Тавре Радиои Озодӣ навиштааст, Осиф Маҳмуд, муовини раиси ниҳоди мазкур 18-уми декабр дар подкасти USCIRF Spotlight Podcast гуфта, ки “ҳукумати Эмомалӣ Раҳмон фаъолияти диндоронро пурра зери назорат дорад ва ҳуқуқи ҳамаи гурӯҳҳоро ба озодии дин поймол мекунад.”
Ӯ гуфтааст, ки Эмомалӣ Раҳмон Тоҷикистонро хонаводагӣ идора мекунад ва ҳар ҳаракату фаъолияти диндорон, бахусус ҷавонони таҳсилкардаро таҳдиде ба худ ва хонаводааш қабул карда, онҳоро барои солҳои тӯлонӣ паси панҷараҳои зиндон мебарад.
Камиссяи байналмилалии Амрико дар мавриди озодиҳои динӣ (USCIRF) беш аз даҳ сол мешавад, ки Тоҷикистонро ҳамчун кишвари саркӯбгари диндорон ва поймолкунандаи ҳуқуқу озодиҳои динии аҳолии ин кишвар дар ҷаҳон муаррифӣ мекунад.
Ин созмони амрикоӣ дар гузориши ахираш, ки моҳи марти соли ҷорӣ нашр карда буд, Тоҷикистонро ба хотири фишор овардан болои диндорон ва “пайваста ва ба таври ҷиддӣ маҳдуд кардани озодии дин” дар рӯйхати “кишварҳои мавриди нигаронии хос”, дар қатори Кореяи Шимоӣ, Бурма, Турманистон, Чин ва дигарон шомил кард.
Мувофиқи иттилои комиссияи мазкур, Тоҷикистон даҳҳо нафарро танҳо ба хотири фаъолиятҳои осоиштаи динӣ боздошту равонаи зиндон кардааст. Шумори дақиқи чунин шахсон маълум нест, вале ба назари ин созмон, шумори онҳо хеле зиёд аст.
Ин ҳам дар ҳолест, ки Эмомалӣ Раҳмон 16-уми декабр зимни ироаи паёмаш ба парлумони кишвар махсус аз сатру либоси занони мусалмон интиқод кард. Ӯ бори дигар ошкоро аз тарзи либоспӯшии занон, аз ҷумла сатрпӯшии онҳоро эрод гирифта, эҳтироми падару модар ва тарбияи фарзандонро ба адои фаризаи ҳаҷ баробар кард.
Коршиносон ин тарзи сухангӯии Эмомалӣ Раҳмонро баёни ошкори нақзи озодиҳои динӣ аз ҷониби раисҷумҳур ва қабул накардани диндорону розӣ набудан ба фаъолияти осоиштаи онҳо талаққӣ мекунанд.
