Рӯзҳои 8-ум ва 9-уми ноябри соли 2025 дар шаҳри Берлин дувумин нишасти Кунгураи Озодихоҳони Ҷаҳон (КОҶ) баргузор гардид.
Хабарнигори Azda tv, ки дар ин нишаст ҳузур дошт, мегӯяд, намояндагон ва мухолифони сиёсӣ ва озодихоҳони 60 кишвари худкомаи ҷаҳон, инчунин беш аз 180 фаъол ва меҳмон аз саросари ҷаҳон дар ин нишаст ширкат варзиданд.
Гуфта мешавад, ин дувумин нишасти Кунгураи мазкур буд. Кунгура соли 2021 ташкил шуда, ҳамоиши аввали он соли 2023 дар шаҳри Вилнюси Литва баргузор гардида буд, ки дар он озодихоҳон 40 кишвари худкома ширкат доштанд. Дар ҳамон сол Масиҳ Алинажод (аз Ирон) ҳамчун раиси КОҶ, Гарри Каспаров (аз Русия) ҳамчун муовини раис ва Леополд Лопес, шаҳрдори собиқи Каракас (аз Венесуэла) ҳамчун дабири кул интихоб шуда буданд.
Дар давоми ду соли роҳбарии онҳо, ҷалби дастгирии парлумони шаҳри Берлин барои баргузории нишасти навбатии КОҶ дар бинои парлумони Берлин аз дастоварди муҳими ин созмон гуфта мешавад.
Муҳаммадҷон Кабиров, мудири расонаи Azda tv, ки ба ҳайси намояндаи Тоҷикистон дар ин нишаст ҳузур дошт, мегӯяд, дар ду рӯзи баргузории Кунгура, ҳайатҳои 60 кишвари ҷаҳон таҷрибаи демократиро баррасӣ карданд. Рӯзи аввал беш аз 30 қатънома дар сатҳи байналмилалӣ ба тасвиб расид. Рӯзи дувум бошад интихоботи Шӯрои роҳбарӣ ва Шӯрои иҷроия, инчунин интихоби раис, муовин ва дабири кул баргузор гардид.
Дар интихоботи Шӯрои роҳбарӣ аз гурӯҳи Аврупои Шарқӣ ва Осиёи Марказӣ 6 номзад барои 5 курсӣ ва 2 номзад барои як курсии котиби минтақавӣ рақобат карданд. Дар раъйдиҳӣ, ки 32 нафар иштирок доштанд, натиҷаҳо чунин эълон гардиданд:
Намояндаи Қазоқистон – 28 раъй;
Намояндагони Тоҷикистон ва Белорус – 23 раъй;
Намояндаи Озарбойҷон, Ариф – 20 раъй;
Меҳман Ҳусейнов – 18 раъй;
Намояндаи Сербия бо 7 раъй ба Шӯрои раҳбарӣ роҳ наёфт.
Дар интихоботи Дабири минтақавӣ бошад, намояндаи Русия бо 20 раъй бар намояндаи Тоҷикистон (11 раъй) ғолиб омад. Намояндагони интихобшудаи Шӯрои роҳбарӣ баъдан бояд як нафарро ба Шӯрои иҷроия пешниҳод мекарданд. Намояндаи Тоҷикистон ва Белорус рақобат карданд ва дар натиҷа, намояндаи Белорус бо аксарияти раъйҳо ба ҳайати Шӯрои иҷроия роҳ ёфт ва минбаъд ҳамчун Омбудсмен фаъолият хоҳад кард.
Ҳайатҳои 60 кишвари дунё раҳбарияти нави Кунгураи Озодихоҳони Ҷаҳонро интихоб карданд. Дар натиҷа, Феликс Марадиага аз Никарагуа ҳамчун раис, Шукрия Борикзай, собиқ намояндаи парлумони Афғонистон ҳамчун муовин ва Карин Канимба аз Руанда ҳамчун дабири кул интихоб шуданд.
Яке дигар аз дастовардҳои КОҶ ин буда, ки шаҳрдори Берлинро мутақоид сохт, то ҳар сол мизбони Ҳафтаи Озодии Берлин (Berlin Freedom Week) бошад. Ҳамчунин дар солҳои оянда низ шаҳри Берлин мизбони нишастҳои навбатии Кунгураи Озодихоҳони Ҷаҳон хоҳад буд. Нишастҳои минбаъда дар бинои парлумони Берлин баргузор мегарданд, то паёме бошанд ба раҳбарони худкомаи ҷаҳон ва умеде барои озодихоҳон ва фаъолони ҳуқуқи башар дар саросари дунё.
Дар поёни рӯз дар бинои парлумони шаҳри Берлин раҳбарияти пешинаи Кунгураи Озодихоҳони Ҷаҳон қудрат ва ихтиёротро ба раҳбарияти мунтахаб интиқол доданд ва раҳбарити мунтахаб маросими савгандёдкуниро баҷо оварданд ва барои 2 соли оянда ин созмонро мудирият хоханд кард.
