Вазорати корҳои дохилии Тоҷикистон аз боздошти ду гумонбар дар қатли Шаҳло Назароваи 45-сола ва се фарзандаш хабар дод.
Дар иттилоияи ВКД аз гумонбарон С.Н. 32-сола ва А.С. 16-сола ду сокини деҳаи Дарёободи ноҳияи Рудакӣ ном бурда шуда, гуфта шудааст, ки онҳо бо мақсади дуздиву ғоратгарӣ ба манзили истиқоматии Иброҳимов Ҳ.Р (падари оила) ворид шудаанд, аммо ҳангоми огоҳ шудани соҳибхона онҳо Шаҳло Назарова ва як писари cинфи 6 ва ду духтари 15 ва 17-солаашро ваҳшиёна ба қатл расондаанд.
Инчунин гуфта мешавад, ки боздоштшудаҳо қаблан низ доғи судӣ дошта, ҳоло дар маҳкамаи муввақатӣ нигаҳдорӣ мешаванд ва тафтишот аз ҷониби додситонӣ идома дорад.
Назари худи гумонбарон ва наздикони онҳо нисбат ба иттиҳомоти мақомот ҳанӯз маълум нест.
Бо вуҷуди оне, ки ВКД акси боздоштшудаҳо ва кушташудаҳоро нашр накардаст ва маълумоти бештар дар ин бора надодааст, акси ҳарду боздоштшуда ва тани беҷони кушташудаҳо дар шабакаҳои иҷтимоӣ давр мезанад.
Ва ин номуайянӣ боиси тарсу ҳароси сокинони маҳал гаштаву овозаҳо ва фарзияҳои гуногуне дар ҷомеа пайдо шудааст, ки то ҳол аз ҷониби манбаъҳои расмӣ тасдиқ нашудаанд.
Ёдовар мешавем, ки қатли як модар ва се фарзандаш дар деҳаи Дарёободи ҷамоати Зайнабободи ноҳияи Рӯдакӣ дар хонаи зисташон 5-уми сентябр рух дода буд, вале ҳамсояҳо ҷасади онҳоро баъди ду рӯз пайдо кардаанд.
Пас аз ин ҳодиса кормандони мақомоти ҳифзи ҳуқуқ сокинон, ҳамсинфону омӯзгорони мактаберо, ки фарзандони Шаҳло Назарова мехондаанд, бозпурсӣ карда, изи ангушт гирифтанд ва бисёриҳоро ҳушдор доданд, ки бидуни иҷозат бо расонаҳо суҳбат накунанд.
