Вазири корҳои дохилии Тоҷикистон Рамазон Раҳимзода мегӯяд, ки дар соли 2021 аъзоёни ташкилотҳои террористӣ ва экстримистӣ дар ҳудуди Тоҷикистон рӯзона камаш 2 ва дар баъзе ҳолатҳо 3 ҷиноят содир кардаанд.
Ба гуфтаи Рамазон Раҳимзода, “дар соли 2021 мақомоти корҳои дохилӣ 572 нафар аъзоёни ташкилотҳои террористӣ ва экстримистиро дар содир кардани 766 ҷиноят ба қайд гирифта аст.”
Вазири корҳои дохилӣ меафзояд, “аз ин 339 нафар барои содир намудани 311 ҷиноят дастгир карда шуда, ба ҷавобгарии ҷиноятӣ кашида шудаанд.”
Тибқи оморҳои расмии ин вазорат, “инчунин 15 ҳолати маблағгузории терроризм, 4 сӯиқасд ва акти террористӣ ва 2 амали террористӣ ба қайд гирифта шуда, содиркунандагони онҳо дастгир карда шудаанд.”
Рамазон Раҳимзода, Вазири корҳои дохилии Тоҷикистон таъкид мекунад, ки дар ин давра “50 нафар аз аъзои ташкилотҳои террористӣ ва экстримистӣ, ки дар хориҷи кишвар қарор доштанд, бо амалӣ намудани чораҳои фаврӣ-ҷутуҷӯӣ ва дар ҳамкорӣ бо ҳамтоёни хориҷии худ дастгир ва ба ватан баргардонида шуданд.”
Ба қавли Вазири корҳои дохилии Тоҷикистон дар давраи ҳисоботии соли 2021 75 нафар аз аъзои ташкилотҳои террористӣ ва экстримистӣ ва иштирокчиёни муҳорибаҳои ҷангӣ дар дигар давлатҳои ҷангзада иштирок доштанд, бо роҳҳои таъсиррасонӣ ихтиёран ба хоҳиши хуб ба ватан баргардонида шуда, аз ҷавобгарии ҷиноятӣ озод карда шуданд.
