Дар шабакаҳои иҷтимоӣ тақрибан ҳар рӯз наворе аз боздошти ҷавонон дар кӯчаҳои Душанбе нашр мешавад. Аксар корбарон онро сарбозшикор ё “Облава” меноманд, аммо мақомот мегӯяд, “Облава” вуҷуд надорад.
Корбаре бо номи Fardoi Tojikiston дар Фейсбук наворе аз лаҳзаи боздошти як ҷавон, ки зоҳиран донишҷӯ аст, нашр кард. Дида мешавад, се нафар ӯро зӯран ба мошини таксии 3333 савор мекунанд ва он ҷавон бо овози баланд гиря мекунад. Дар зери ин навор бештар аз 300 шарҳ навишта шудааст.
Дар шарҳҳои зери навор зане бо номи Наргис Рахматшоева аз ҷавони боздоштшуда Шоҳрух ном мебарад ва мегӯяд шогирдаш асту корманди ТВ “Душанбе” будааст. Ӯ афзуда, ки Шоҳрух баъди боздошт ба комиссариати ноҳияи Шоҳмансури шаҳри Душанбе бурда шудааст.
Вокуниши корбарон гуногун аст, баъзеҳо менависанд, ки агар ин кор ҳаминхел идома кунад, дар оянда шояд одамрабоёни ҳақиқӣ дар кӯча даст ба одамдуздӣ бизананд, вале мардум гумони “Облава” карда, касе кумак намекунад.
Корбаре бо номи Умеджон Давлатов менависа: “Ягон кас намепурсад, ки киен чиен ин шахсро куҷо мебаред? Мумкин “облава” набошад, ин шахсро куштанӣ бурда истода бошанд. Чаро ҳама хомӯш гузашта рафта истодаанд?”
Дар байни шарҳнависон нафароне низ ҳастанд, ки аз ин амалкарди мақомот пуштибонӣ намуда, ҷавононро ба тарсуӣ ва содиқ набудан ба ватани худ муттаҳам намуда, мегӯянд, “онҳо ҷавонанд ва аз адои хидмат дар артиш натарсанд ва бояд рафта содиқона хидмат намоянд.”
Аммо дар посух нафарони зиёде ин бархурди мақомдоронро интиқод намуда, мегӯянд, ҳукумат бояд ин мушкилиро ҳал кунад. Корбаре менависад, “барои як давлат ба ин шакл сарбоз ҷамъ кардан шармандагист. Оғилхона нест, ки мардумро зӯран кашонда барӣ. Бояд ҳукумат талош кунад, барномаи дуруст роҳандозӣ кунад то ҷавонон ба хидмат ҳавасманд шаванд. Ба ин шакле, ки ҳоло мебаранд, аксари ин ҷавонҳо содиқона хидмат намекунанд. Ва ин кори мақомот сатҳи фасоду ришваро бештар мекунад на чизи дигар.”
Солҳост, ки ҷомеаи шаҳрвандӣ ва шахсони алоҳида аз ин рафтори мақомот интиқоди шадид мекунанд, аммо ҳамчунон ин корро идома дорад. Дар рӯзи равшан рабудани донишҷӯён аз назди донишгоҳҳо, ва кӯчаву бозорҳо касеро водор намекунад, ки ба амали ғайриқонунии мақомот вокуниш нишон бидиҳанд.
