Имрӯз, 1-уми августи соли 2022 Президенти Тоҷикистон Эмомалӣ Раҳмон бо вазири корҳои хориҷии Чин Ван Иро мулоқот кард.
Тавре расонаи ҳукуматии “Ховар” хабар дод, “дар мулоқот ҷонибҳо муносибатҳои дуҷониба ва бисёрҷонибаи Тоҷикистон ва Чинро баррасӣ карданд.”
Гуфта мешавад, Эмомалӣ Раҳмон зимни суҳбат Чинро дар ҳама ҷонибҳо шарики стратегӣ хонда ҳавасмандии худро дар робита ба ҳамкориҳои дуҷониба дар ҳама самтҳо бо ин кишвари иброз доштааст.
“Тибқи омор, дар нимаи аввали соли равон гардиши мол миёни ду кишвар дар муқоиса ба ҳамин давраи соли гузашта тақрибан ҳаштоду ду дарсад афзоиш ёфта, беш аз нуздаҳ дарсад аз ҳаҷми умумии гардиши савдои хориҷии Тоҷикистонро ташкил медиҳад”, таъкид мешавад дар хабар.
Дар гуфтугӯи Эмомалӣ Раҳмон бо вазири корҳои хориҷаи Чин масъалаҳои муборизаи муштараки ду шарики стратегӣ бар зидди терроризму экстремизм, сепаратизм, ҷиноятҳои муташаккили фаромиллӣ, аз ҷумла қочоқи маводи мухаддир, киберҷиноят ва дигар таҳдидҳои амниятӣ низ баррасӣ шуданд.