Паноҳҷӯи тоҷик Парвиз Зоиров, ки моҳи октябри соли ҷорӣ аз Фаронса ба Тоҷикистон ихроҷ шуда буд, ба 13 соли зиндон маҳкум шуд.
Радиои Озодӣ дар истинод ба наздикони Зоиров навиштааст, ки мурофиаи охири ӯ 12-уми декабри соли ҷорӣ дар Додгоҳи ноҳияи Исмоили Сомонӣ баргузор шуда, додрас ӯро ба тундгароӣ ва зархаридӣ гунаҳкор кардааст.
Назари худи Парвиз то ҳол дастраси расонаҳо нашудааст ва маълум нест, таҳқиқи парванда ва мурофиаи ӯ дар чӣ шароите гузаштааст.
Паноҳҷӯи тоҷик Парвиз Зоиров соли 2022 ба воситаи Беларус ба Литва ва сипас дар аввали соли 2025 ба Олмон рафта буд. Аммо мақомоти Олмон бо дархости Душанбе бо ӯ суҳбат кардаанд ва Парвиз ба хотири фиристода нашуданаш ба Тоҷикистон ба Фаронса мераваду дар онҷо дастгир мешавад. Мақоти Фаронса ӯро пас аз 55 рӯз аз боздоштгоҳи Нитса ба Тоҷикистон ихроҷ мекунанд.
Гуфта мешавад, Парвиз Зоиров аз язгуломиҳои маҳаллаи “Дарвоз”-и Душанбе аст, ки соли ҷорӣ аз ин маҳалла беш аз бист нафар бо иттиҳомоти ифротгароӣ ва барангехтани адовати диниву мазҳабӣ боздошту зиндонӣ шуда буданд, иттиҳомоте, ки пайвандонашон онро сохта ва рад мекунанд.
Бояд гуфт, Парвиз ягона паноҳҷӯи тоҷик нест, ки аз кишварҳои урупоӣ ихроҷ ва дар Тоҷикистон бо иттиҳомоти сохта барои солҳои тӯлонӣ равонаи зиндон мегардад. Пештар аз ӯ Ҳизбулло Шовализода аз Австрия, Абдуллоҳи Шамсиддин, Билол Қурбоналиев ва Дилмурод Эргашев аз Олмон, Фаррух Икромов аз Лаҳистон ва Фарҳод Неъматов аз Шветсия ихроҷ ва дар Тоҷикистон аз 7 то 23 сол маҳкум ба зиндон шуданд.
