Ҷамила Нурзод, як зани 30-солаи тоҷик рӯзи 21-уми сентябр аз ҷониби як шаҳрванди Русия бераҳмона кушта шуд.
Ба гуфтаи муҳоҷирон ва блогерони тоҷики муқими Русия, Ҷамила сокини шаҳри Ваҳдати Тоҷикистон буд ва дар шаҳри Маскав дар як ошхона кор мекард, вале вақтҳои бекорӣ дар хонаҳои мардум поккорӣ ҳам мекардааст.
Ба иттилои расонаҳо, Додгоҳи Головинскии Маскав рӯзи 6-уми октябри соли ҷорӣ як сокини 49-солаи шаҳри Головинскии Маскавро бо номи Владимир Упадишев дар қатли ин зани тоҷик гунаҳкор эълон карда, қарори ҳабси пешакии ӯро содир кард. Гуфта мешавад, ин мардро рӯзи 24-уми сентябр, пас аз се рӯзи ҳодиса боздошт карда буданд.
Додгоҳ Владимир Упадишевро ба он айбдор кард, ки зани 30-солаи тоҷикро бераҳмона кушта, амволашро нобуд кардааст.
Тавре Радиои Озодӣ хабар дода, “ин мард рӯзи 21-уми сентябри имсол Ҷамилаи Нурзоди 30-соларо, ки дар ошхонае кор мекард, барои тамиз кардани манзили зисташ киро кардааст. Зан ифлосии хонаро дида, аз тоза кардани он даст мекашад, вале ин мард ба ғазаб омада ба руй ва бадани ӯ бо печтоб ё отвёртка зарба мезанад. Вақте Ҷамила беҳуш мешавад, Упадишев барои руйпуш кардани ҷинояташ хонаро оташ задаву дарро баста гурехтааст. Ҳамсояҳо дуди хонаро дида, сӯхторнишонҳоро даъват намудаанд.”
Аммо гурӯҳи кумак барои наҷоти ҷони Ҷамила талош мекунанд ва ӯро ба беморхона мебаранд, вале дер шуда буд ва ӯ ба бемористон нарасида вафот мекунад.
Радиои Озодӣ аз манобеи худ хабар дод, ки онҳое, ки Ҷамиларо мешинохтанд, дар суҳбат бо ин расона гуфтаанд, ки “муноқиша ва муқовимат байни ӯ ва ин мард баъди он сар задааст, ки Упадишев мехостааст, ба номуси зан дастдарозӣ кунад.”
Чанд рӯз пеш ҳам чанде аз блогерони тоҷик дар шабакаҳои иҷтимоӣ видеоҳо нашр карда, гуфтанд, ки ҳоло ҷасади Ҷамила дар сардхонае дар шаҳри Маскав аст ва аз шаҳрвандони кишвар хостанд, ки барои ирсоли ҷасад ба Ватан кумак кунанд.
Гуфта мешавад, солона ҳудуди ҳазор ҷасади муҳоҷири тоҷик, ки дар Русия кору зиндагӣ мекунанд, аз заонону мардон ба Тоҷикистон оварда мешаванд.
Мунтақидони Ҳукумат мегӯянд, мақомоти Тоҷикистон бояд дар чунин ҳолатҳо сари вақт ба соҳибони фавтида кумак кунанд ва ҷасади шаҳрванди худро ба Ватан бифиристанд. Аммо дар чунин ҳолатҳо ҳамеша худи муҳоҷирон даст ба кор мешаванд ва аз дигарон маблағ ҷамъоварӣ мекунанд, то ҷасадҳоро бифиристанд, вале Ҳукумат парвое надорад.
