14.9 C
Dushanbe

“Мошный бизнес” дар зиндони нав

Даҳҳо нафар дар зиндони нав бо сабабҳои риъоя нашудани қоидаҳои гигиенӣ, обҳои ифлос, хӯрокҳои номуносиб ва аз меъёр зиёд ғунҷондани маҳбусон дар ҳуҷраҳо масмум шудаанд.

Ба гуфтаи ҷамъе аз пайндони зиндониён ҳуҷраҳои маҳбусони интиқолёфта ба зиндони нав дар шаҳри Ваҳдат аз камобӣ, оббозӣ накардан ва надоштани либосҳои алоҳида барои иваз кардан тамоми фазои ҳуҷраҳои маҳбасро бадбӯй кардааст.

Сурат: аз дастовезҳои мардум барои зиндониён

Тибқи иттилои манобеи Аздо тв, дар зарфи беш аз ду ҳафтае, ки маҳбусон ба зиндони нав интиқол ёфтаанд, аз оддитарин шароити будубош дар зиндон маҳрум ҳастанд. Онҳо на оби тозаи ошомиданӣ доранд ва не хӯроки маъмулие, ки ишкамашонро сер кунанд.

Як манбаъ, ки нахост номаш зикр шавад, дар суҳбат бо “Аздо тв” гуфт, зиндониён пас аз ду ҳафтаи кӯчонида шудан ба зиндони нав дар шаҳри Ваҳдат бо хонаҳояшон тамос гирифта аз танқисии оби ошомиданӣ шикоят карданд.

Ба гуфтаи ӯ, шароити зиндони нав бадтар аз шароити зиндони куҳна будааст. Ва онҷо онҳо на об доранду на хӯроки хуб.

“Мо пештар ҳар ду ҳафта пас ба маҳбусамон либосҳои тоза мебурдем ва либосҳои чиркини ӯро оварда мешустем ва боз бурда медодем, аммо ҳоло ду ҳафта мешавад, ки онҳо дар тан як либос доранд. Маҳбусон ҳатто оби тоза барои нӯшидан надоранд, куҷо расад об барои либосшӯӣ”, – афзуд манбаи “Аздо тв”.

Ҳамзамон беш аз 10 манбаъ ба Аздо тв гуфтанд, ки аз зиндони нав (рақами 3/1 маъруф ба “кирпичний”) дар шаҳри Ваҳдат ба онҳо тамос гирифта хоҳиш кардаанд, ки барояшон оби ошомиданӣ, косаву қошуқ ва плитаҳои сенсорӣ биоранд.

Аммо вақте наздикону пайвандони зиндониён дастовез (дачка)-ҳои худро ба назди зиндонбонҳо мебаранд, зиндонбонҳо дар ивази интиқоли ҳар дастовез аз мардум аз 20 то 50-60 сомонӣ пул меситонанд.  

Ин ҳам дар ҳолест, ки Ҷамшед Ёров, бародари Бузургмеҳр Ёров, зиндонии сиёсӣ ба Аздо тв гуфт: Бузургмеҳр Ёров аз пайвандонамон хоста, ки барояш коса, қошуқ, табақ ва лавозимоти гигиенӣ биёранд.

Инчунин Шуҳрати Раҳматулло, фарзанди зиндонии сиёсӣ Раҳматуллоҳи Раҷаб дар суҳбат ба Аздо тв гуфт, пайвандонамон аз субҳи имрӯз то ҳол дар назди зиндон ҳастанд, то дастовезҳои худро ба падарам бирасонанд. Аммо азбаски навбат зиёд аст ва дар ин васат афроди бенавбат ҳам ворид мешавад, мо маҷбурем, ки то бегоҳ интизор бошем, зеро падарам гуфтанд, ки оби ошомиданӣ надоранд, мо 10 лирт об овардем, навбати мо 145-ум нафар сабт шудааст, интизор мешавем, то об ва ашёи дигарро ба ӯ бирасонем.  

Ҳамзамон ҳамсари яке аз зиндониён дар суҳбат ба мо гуфт, шавҳараш дар ин зиндон аст ва тайи ду ҳафтаи ахир бо як либос нигаҳдорӣ мешавад ва аз сабаби он, ки дар як ҳуҷра аз меъёр зиёд нигаҳдорӣ мешаванд ва тармими ҳамомҳояшон нотамом аст, натавонистааст то ҳол оббозӣ кунад. Инчунин хамираи дандон, собун ва ашёи гигиении шахсӣ низ талаб кард.

Ба қавли манбаъ, оне, ки пештар мақомот гуфта буданд, дар як ҳуҷра 10-нафарӣ ҷойгир мекунанд, дурӯғ будааст. Ҳоло дар ҳуҷраҳо аз 20 то 120 нафарро ҷой кардаанд.

Мақомот пеш аз интиқоли маҳбусон ба зиндони нави шаҳри Ваҳдат гуфта буданд, ки онҷо тибқи стандартҳои байналмиллалӣ сохта шуда, аз ҳама нигоҳ аз зиндонҳои Тоҷикистон беҳтару шароити хубтар дорад. Аммо шикояти маҳбусон аз беобӣ, 120-нафарӣ дар ҳар ҳуҷра, дар шароити сахт нигаҳдории онҳо акси гуфтаҳои мақомотро бозгӯ мекунад.

Тамосҳои ба такрори Аздо тв ба Раёсати иҷрои ҷазои ҷиноятии Вазорати адлияи Тоҷикистон бенатиҷа боқӣ монд.

Хабарро таблиғ кунед:

БЕШТАР БИХОНЕД
БЕШТАР БИХОНЕД

Тоҷикистон шомили кишварҳои олудатарини ҷаҳон шуд

Созмони швейтсариягии IQAir, ки сифатнокии ҳаворо дар кишварҳои ҷаҳон таҳқиқ мекунад, дар гузориши тозааш Тоҷикистонро шомили кишварҳои олудатарини дунё кардааст.

Шикояти муҳоҷирони тоҷик дар Русия аз боздошту шиканҷа

Пас аз ҳодисаи ҳамла ба бинои "Крокус Сити Ҳолл" дар Маскав муҳоҷирони тоҷик аз ҷониби пулис ва ҳатто мардуми оддӣ мавриди ҳамлаҳои лафзӣ ва ҷисмӣ қарор гирифтаанд.

Ҳабси пешакии гумонбарон дар ҳамлаи хунини Русия

Пас аз ҳодисаи ҳамла ба бинои "Крокус Сити Ҳоле" дар Маскав муҳоҷирони тоҷик аз ҷониби пулис ва ҳатто мардуми оддӣ мавриди ҳамлаҳои лафзӣ ва ҷисмӣ қарор гирифтаанд.

Баррасии ҳамкориҳои Тоҷикистону Туркия

Мақомоти баландпояи Тоҷикистон ва Туркия дар бораи ҳамкориҳои худ ва аз он ҷумла дар бораи масоили амниятӣ суҳбат карданд.