Мақомоти Комиссарияти ҳарбӣ дар баъзе ноҳияҳои вилояти Хатлон барои ба артиш фиристодани фарзандон падаронро то 10 рӯз зиндонӣ мекунанд.
Як манбаъ аз вилояти Хатлон, ки нахост номи худ ва деҳааш зикр шавад, рӯзи ҷумъа, 7-уми ноябр дар тамос ба Azda tv гуфт, ки маъумрони Комиссарияти ҳарбии ноҳия ҳамроҳ бо пулиси минтақа ва чанд маъмури дигар аз як деҳа тақрибан 6-7 сокинро ба хотири фарзандонашон, ки ба синни хидмати ҳарбӣ расидаанд, вале ҳоло дар Русия қарор доранд, бурда чанд рӯз зиндонӣ карданд.
“Имсол мардуми деҳаҳоро бисёр ғам доданд. Чунин ҳолатро ҳеч вақт надида будем. Ҳатто баъди солҳои ҷанг, ки аз ҳама вазъияти сахт буд, бо мардум ин гуна рафтор намекарданд. Аввал аз фарзандонамон метарсидем, ҳоло аз худу аз ҳамсаронамон метарсем, ки бурда зиндонӣ мекунанд ва пули зиёд талаб мекунанд.”, – мегӯяд манбаъ.
Инчунин манбаъ афзуд, ки баъзе падарон ҳатто то 20 ҳазор сомонӣ дода худро халос карданд. Ӯ таъкид кард, ки “Онҳо дар ҳамкорӣ бо милитсия роҳи пулкоркунии навро ёд гирифтаанд. Вақте отдел (шуъбаи пулис) мебаранд, парвои бачаат надоранд, фақат маҷбурат мекунанд, ки ба бачаат бигӯ фалон миқдор пул фиристад туро раҳо мекунем, набошад ҳаминҷо мемонӣ.”
Ин дар ҳолест, ки Вазорати мудофиаи кишвар иддао дорад “қонуншиканиҳо” дар даъвати сарбозон ба артиш вуҷуд надорад ва дар аксар ноҳияҳои Хатлон аллакай нақша 100% иҷро шудааст. Ин ниҳод ҳамчунин дар посух ба наворҳои “облава” мегӯяд, он “шӯхӣ” аз ҷониби дӯстони ҷавон буда, ё маъмурон шахси муҷримеро дастгир мекунанд. Аммо, сокинони маҳалҳо аз тағйир ёфтани усули сарбозшикор шикоят мекунанд.
Соли гузашта марудми навоҳии дурдаст аз он шикоят мекарданд, ки кормандони комиссариятҳои ҳарбӣ ба деҳаҳои дурдаст рафта, барқи сокинонро ба шарти овардани сарбозон қатъ мекарданд ва ё дари масҷидҳоро то комил шудани нақша бар рӯи намозгузорон мебастанд. Ва вақте мардуми деҳа пул ҷамъоварӣ анмуда, ба маъмурон медоданд, барқ дода мешуд ва дари масҷид ҳам боз мешуд.
Барои дарки ҳақиқат Azda tv аз сокинони кишвар мепурсад, ки агар чунин ҳолатҳое дар дигар ноҳияҳои ҷумҳурӣ вуҷуд дошта бошад, лутфан ба мо хабарҳои худро фиристед, ҳувияти шумо махфӣ мемонад. Мақомот мегӯяд, “облава” вуҷуд надорад, оё воқеан чунин аст? Шумо чӣ мебинеду чӣ мегӯед?
