Котиби матбуоти Президенти Тоҷикистон дар посух ба суоли Azda tv, ки оё Раҳмон баъди нишасти СММ дар Амрико қасди сафар ба Олмонро дошт, посухи рад дод. Аммо мухолифин чизи дигар мегӯянд.
Абдуфаттоҳ Шарифзода, котиби матбуоти Эмомалӣ Раҳмон дар хусуси сафари раисҷумҳур ба Аврупо ба Azda tv гуфт: “Не чунин сафар пеш ва ё пас аз СММ дар нақшаи кории Президенти Тоҷикистон умуман набуд ва нест”.
Дар ҳоле Шарифзода хабари сафари Раҳмонро ба Аврупо рад мекунад, ки гурӯҳе аз мухолифини тоҷик, ки 25-уми марти соли ҷорӣ дар назди парлумони Олмон дар робита ба сафари Эмомалӣ Раҳмон тазоҳурот карданд, гуфта буданд, ки тазоҳурот ва номанигории онҳо ба кишварҳои Аврупоӣ сабаб шуд, ки Раҳмон сафараш ба Олмонро лағв кунад.
Алим Шерзамонов, муовини раиси Паймони миллии Тоҷикистон мегӯяд: “Агар сафари Раҳмон дар нақшаи корӣ намебуд, Абдуфаттоҳ Шарифзода ба расонаи тоҷикии дар хориҷбуда – Azda.tv дар ин бора посух намедод ва ё тамоман посухи дигаргуна медод”.
Ёдовар мешавем, ки Эмомалӣ Раҳмон рӯзи 20-уми марти соли 2023 бо як сафари корӣ ба Ню-Йорк рафта, аз 22-ум то 24-уми март дар Конфронси бахшида ба оби Созмони Милали Муттаҳид, ки онро кишвари Ҳолланд бо ҳамраисии Тоҷикистон баргузор карда буд, ширкат кард. Пештар гуфта мешуд, ки Эмомалӣ Раҳмон баъд аз сафараш ба Амрико, ба Олмон ва Британияи Кабир низ сафар анҷом хоҳад дод, аммо ин сафарҳо сурат нагирифтанд. https://azda.tv/sharifzoda-priezidient-kasdi-safar-ba-olmnro-nadosht/
