Мақомоти Тоҷикистон собиқ раиси Фурӯдгоҳи байналмилалии шаҳри Душанбе ва ширкати ҳавопаймойи “Тоҷик-Эйр”-ро боздошт кардаанд.
Бино ба иттилои расонаҳо, 26-уми майи соли 2023 бо амри Додситонии кулли Тоҷикистон Рустам Холиқов, собиқ раҳбари ширкати ҳавопаймоии Тоҷик-Эйр ва мудири Фурӯдгоҳи байлналмилалии шаҳри Душанбе боздошт шудааст.
Радиои Озодӣ ба нақл аз манбаъҳои худ хабар додааст, ки “Рустам Холиқов ба “азхудкунӣ ё исрофи маблағ”, “сохтакорӣ” ва “қаллобӣ” муттаҳам аст.”
Ба қавли манбаъ, дар ҳоли ҳозир “амволу дороиҳояш низ феълан ба ҳабс гирифта шудааст. Парванда ба замони кораш дар ширкати “Тоҷик Эйр” пайванд дорад.”
Аммо 25-уми июли соли 2014 дар як суҳбати худ бо расонаҳо гуфта буд, ки айни замон қарзи ширкати Тоҷик-Эйр дар назди Фурӯдгоҳи Душанбе беш аз 70 миллион сомониро ташкил медиҳад ва барои беҳтар кардани вазъи иқтисодии ин ширкат талош мекунем.
Ба қавли ББС, 19-уми январи соли 2015 Рустам Холиқов дар нишасти матбуотии муштараки Фурӯдгоҳи байналмилалии шаҳри Душанбе ва ширкати “Тоҷи-Эйр” гуфта буд, дар тӯли камтар аз шаш моҳ ин ширкат вомҳои худ дар назди фурӯдгоҳҳои байналмилалиро пардохт кардааст ва онҳо тавонистаанд, бехатарии парвозҳои ҳавопаймоҳои ин ширкатро таъмин кунанд.“
Ҳамзамон бархе коршиносон мегӯянд, дар фалаҷ сохтани ширкати Тоҷик-Эйр ва қарздор кардани он худи Президенти Тоҷикистон низ бевосита саҳмгузор аст. Эмомалӣ Раҳмон бо додани имтиёзҳои зиёд ба ширкати ҳавопаймоии Сомон-Эйр, ки як ширкати офшорӣ ва ба додарарусаш Ҳасан Асадуллозода марбут аст, беш аз нисфи хатҳои парвози Тоҷик-Эйрро бекор ва ин ширкати давлатиро муфлис кардааст.
Гуфта мешавад, 21-уми июли соли 2014 Эмомалӣ Раҳмон бо судури як Қарори худ амр карда буд: Ба ӯҳдаи Холиқов Рустам Исуфович директори генералии Ҷамъияти саҳомии кушодаи “Фурӯдгоҳи байналмилалии Душанбе”, ҳамзамон иҷрои ваколатҳои директори генералии Ҷамъияти саҳомии кушодаи “Тоҷик Эйр” вогузор карда шавад.”
Рустам Холиқов дар ин мақом то 27-уми январи соли 2016 кор кард ва баъдат бо як фармони дигари Эмомлӣ аз вазифаи Директори генералии Ҷамъияти саҳомии кушодаи “Фурӯдгоҳи байналмилалии Душанбе” озод карда шуд.
Ин бори аввал нест, ки дар бораи оғоз шудани парванда ва содир шудани ҳукми боздошт нисбат ба собиқ мудири Ҷамъияти саҳҳомии кушодаи Тоҷик-Эйр хабарҳо расонаӣ мешаванд, балки субҳи 4-уми августи соли 2019 низ Рустам Холиқов пеш аз парвоз ба Туркия дар Фурӯдгоҳи байланмилалии шаҳри Душанбе тавассути кормандони Кумитаи давлатии амнияти миллии Тоҷикистон боздошт ва баъд аз бозпурсӣ раҳо шуда буд.
Мақомот Тоҷикистон то ҳол расман дар бораи боздошти ӯ ба расонаҳо иттилоъ надодаанд ва аз сӯи дигар на худи ӯ на вакили дифоъ ва на наздикону пайвандонаш дар бораи сабабҳои ин боздошт ва иттиҳомоти ворид шуда ба он изҳори назар накардаанд.
