Русия ва Украина барои расонидани кумак ба Олешки оташбаст эълон карданд

Дар шаҳри Олешкии ҷануби Украина рӯзи 27-уми октябр оташбаси маҳдуди башардӯстона ба иҷро даромад. Ҳадафи ин тавофуқ фароҳам овардани шароити амн барои расонидани кумакҳои башардӯстона ва кӯчондани сокинони осоишта аз ин минтақаи ҷангзада мебошад.

Тибқи иттилои расонаҳо , ин оташбас ҳафтаи гузашта бо миёнравии Мелания Трамп, ҳамсари президенти Амрико Доналд Трамп, ба даст омада, аз ҷониби Русия ва Украина пазируфта шудааст. Мелания Трамп гуфтааст, ки вазъи башардӯстона дар Олешки бисёр нигаронкунанда аст ва маҳз ҳамин вазъ сабаби талошҳои миёнравонаи ӯ шудааст.

Ба гуфтаи мақомоти Украина, дар Олешки ҳанӯз тақрибан ду ҳазор ғайринизомӣ боқӣ мондаанд. Аксари онҳо пиронсолон мебошанд, ки ба дору, ғизо, оби ошомиданӣ ва кумаки фаврии тиббӣ ниёз доранд.

Бар асоси нақшаи пешбинишуда, қабл аз оғози интиқоли кумакҳо роҳҳои вуруд ба шаҳр бояд аз минаҳо поксозӣ шаванд. Пас аз он корвонҳои башардӯстона ва нақлиёти эвакуатсионӣ метавонанд ба шаҳр ворид шаванд. Мақомоти Украина мегӯянд, садҳо нафар барои берун овардан аз минтақаи хатарнок номнавис шудаанд.

Бо вуҷуди оғози оташбас дар Олешки, дар дигар минтақаҳои Украина даргириҳо идома доранд. Чанд соат пеш аз мавриди амал қарор гирифтани ин тавофуқ, Русия ба Киев ва чанд минтақаи дигар ҳамла анҷом дод. Ба гуфтаи мақомоти Украина, дар натиҷаи ин ҳамлаҳо ба хобгоҳи донишҷӯён ва дигар иншооти ғайринизомӣ осеб расида, дастикам як нафар кушта шудааст. Ин иддао то ҳол аз ҷониби манбаъҳои мустақил тасдиқ нашудааст ва Русия низ дар ин робита изҳороти расмӣ нашр накардааст.

Гуфта мешавад, ки ин тавофуқ танҳо ба минтақаи Олешки дахл дорад. Коршиносон бар ин назаранд, ки онро набояд оғози оташбаси умумӣ ё поёни ҷанги Русия ва Украина арзёбӣ кард. Бо вуҷуди ин, онҳо ин иқдомро як қадами муҳим барои наҷоти ҷони сокинони осоишта ва расонидани кумакҳои башардӯстона ба минтақаи даргирӣ медонанд.

Ҳоло маълум нест, ки ин оташбас то кадом муддат идома хоҳад кард, кадом созмонҳо масъули расонидани кумакҳо хоҳанд буд ва назорати иҷрои тавофуқ чӣ гуна анҷом дода мешавад. Ҳамчунин вокуниши расмии Русия ба иддаои ҷониби Украина дар бораи ҳамлаҳои ахир ҳанӯз маълум нест.

Хабарро таблиғ кунед:

БЕШТАР БИХОНЕД
БЕШТАР БИХОНЕД

Боздошти гурӯҳре, ки беш аз ним тонна маводи мухаддиро ба хориҷ интиқол додаанд

Вазорати корҳои дохилии Тоҷикистон аз боздошти нуҳ нафар бо гумони қочоқи маводи мухаддир хабар дод.

Идомаи боздоштҳо ва ихроҷи муҳоҷирон аз Русия

Пулиси Русия аз ихроҷи 121 шаҳрванди хориҷӣ пас аз рейдҳои густурда дар шаҳри Жуковскии вилояти Маскав хабар дод.

Тоҷикистон барои воридоти 100 ҳазор тонна дизели иловагӣ бо Русия мувофиқа кард

Тоҷикистон бо Русия барои афзоиши квотаи воридоти бебоҷи сӯзишвории дизелӣ дар соли 2026 ба мувофиқа расидааст.

Амрико як шаҳрванди Тоҷикистонро барои кумак ба хариди силоҳ барои Эрон таҳрим кард

Департаменти давлатии ИМА рӯзи 4-уми ноябр алайҳи се шахс ва чанд ширкат таҳрим ҷорӣ кард, ки дар миёни онҳо як шаҳрванди Тоҷикистон низ ҳаст.