Тоҷикистон аз рӯи шумораи ғуломони муосир дар ҷаҳон дар ҷойи шашум қарор дорад.
Бино ба гузориши “Global Slavery Index”, Тоҷикистон ҳудуди 133 ҳазор ғуломи муосир дорад ва бо ин шумора миёни кишварҳои Осиёи Марказӣ пешсаф аст.
Ин гузориш аз ҷониби созмони ҳомии ҳуқуқи “Walk Free” дар ҳамкорӣ бо Созмони байнулмилалии кор ва Созмони байнулмилалии муҳоҷират таҳия шуда, дар он вазъи 160 кишвари ҷаҳон баҳогузорӣ шудааст.
Ба гуфтаи гузоришгарон, ҳоло дар ҷаҳон 49,6 миллион нафар ҳамчун ғуломи муосир шинохта шуда, аз се ду ҳиссаи онҳо танхо дар даҳ кишвари ҷаҳон ба сар мебаранд.
Гузоришгарон бар ин назаранд, ки ғуломдории муосир ба ҳамагуна ҳодисаи истисморе дахл дорад, ки дар он шахс наметавонад аз сабаби таҳдид, зӯроварӣ, маҷбурӣ, сӯиистифодаи нафаре аз қудрат ё фиреб аз коре ё амале даст кашад ва ё онро тарк кунад.
Тибқи гузориши “Global Slavery Index” дар Тоҷикистон аз ҳар 1000 нафар 14 нафар дар ғуломӣ зиндагӣ мекунанд ва бо ин омор вазъи Тоҷикистон бадтар аз Русия ва Афғонистон гуфта шудааст.
Гузоришгарон Русияву Афғонистонро бо аз сари ҳар 1000 нафар 13 ғулом дар ҷойҳои 9 ва 10 қарор додаанд.
Бино ба гузориши “Global Slavery Index” бештар аз ҳама ғуломдории муосир дар Кореяи Шимолӣ, Эритрея, Мавритания ва аз ҳама камтар дар кишварҳои пешрафтаи ҷаҳон ба мисли Дания, Шветсия, Нидерландия, Олмон, Норвегия ва Швейтсария паҳн шудааст.
Бино ба арзёбии “Global Slavery Index” соли 2018 дар Тоҷикистон наздик ба 39 ҳазор нафар дар шароити “ғуломии муосир” ба сар мебурданд ва дар миёни 1000 нафар аҳолии Тоҷикистон 4 нафар дар чунин шароит қарор доштанд. Бо ин омор Тоҷикистон он замон миёни кишварҳои ҷаҳон дар мақоми 75 қарор дошт.
Ба гуфтаи таҳлилгарон, якуякбора дар ин радабандӣ боло рафтани мақоми Тоҷикистон гувоҳи он аст, ки вазъи ҳуқуқии инсон дар кишвар сол ба сол бадтар мешавад.
