Эмомалӣ Раҳмон бо судури як қатор амру фармонҳо муовинони Маркази исломшиносии вобастаи Президенти Тоҷикистонро тағйир дод.
Инчунин имрӯз, 18-уми июли соли 2023 Эмомалӣ Раҳмон бо чанд фармонҳо судяҳои бархе шаҳру ноҳияҳои кишварро тағйир дода, ҳамзамон дар мувофиқа бо ӯ прокурорҳои баъзе шаҳру ноҳияҳо низ иваз карда шуданд.
Бар асоси як фармони Эмомалӣ Раҳмон, 10 судя, аз он ҷумла раисони судҳои шаҳри Душанбе ва шаҳри Кӯлоб, муовинони суди шаҳри Ваҳдат ва бархе шаҳру ноҳияҳо низ дар вилоятҳои Суғд, Хатлон ва Вилояти Мухтори Кӯҳистони Бадахшон ҷойҳои худро бо якдигар иваз карданд.
Тибқи чор қарор раиси ҳукумат муовинони пешини вазири кишоварзии Тоҷикистонро аз вазифа барканор ва ба ҷои онҳо муовинони нав таъйин кард.
Инчунин имрӯз Ваҳобзода Абдураҳмон аз вазифаи муовини раиси Кумитаи дин, танзими анъана ва ҷашну маросими назди Ҳукумати Ҷумҳурии Тоҷикистон озод ва муовини директори Маркази исломшиносии вобастаи Президенти Тоҷикистон таъйин карда шуд. Ва Абдухалилзода Кароматулло Абдухалил низ муовини директори Муассисаи давлатии “Маркази исломшиносӣ дар назди Президенти Ҷумҳурии Тоҷикистон” таъйин карда шуд.
