Шаби 1-уми август пойтахти Федератсияи Русия шаҳри Маскав мавриди ҳамлаи паҳподҳо қарор гирифт.
Бино ба иттилои Сергей Собянин, шаҳрдори Маскав чанд паҳпод кӯшиш карданд, ки ин шаҳро мавриди ҳамла қарор диҳанд, аммо тавассути системаҳои дифои ҳавоӣ сарнагун карда шуданд ва касе зарар надидааст.
Яке аз ин бесарнишинҳо ба табақаи 21-уми маҷмааи тиҷоратии “Маскав Сити”, ки дар ин табақа идораҳои вазоратҳои рушди рақамӣ, рушди иқтисод, саноат ва савдои Федератсияи Русия ҷойгиранд, бархурда, дар натиҷаи он 150 метри мураббаъ шишаи ин бино шикаста, фурӯ рехтааст.
Дар ҳамин ҳол Вазорати дифои Русия бо нашри изҳороте мисли пештара гуфтааст, ки “аз кӯшиши ҳамлаи террористии режими Киев бо ҳавопаймоҳои бесарнишин” ҷилавгирӣ кардааст.
Ба иддаои ин ниҳод, дар ҳамлаи шаби 1-уми август дар маҷмуъ се “паҳподи украинӣ” ҳамла кард, ки дутои он тавассути системаи дифоъи ҳавоӣ дар ҳудуди ноҳияҳои Одинтсово ва Нарофомински вилояти Маскав нобуд карда шудаанд. Аммо бесарнишини сеюм ба маҷмааи тиҷоратии “Маскав-Сити” бархурдааст.
Мақомоти Маскав кори фурӯдгоҳи Внуковоро муваққатан қатъ кардаанд.
Пас аз ҳамлаи паҳподҳо ба шаҳри Маскав, котиби матбуотии раисҷумҳури Русия Дмитрий Песков гуфт, ки то ҳол дар шаҳр таҳдид вуҷуд дорад.
Аз оғози ҳамлаи густурдаи Русия ба Украина, Маскав борҳо мавриди ҳамлаи ҳавопаймоҳои бесарнишин қарор гирифтааст.
Дар як моҳи охир чунин “ҳамлаҳо” ба Маскав ҳадди ақал чор маротиба сурат гирифт.
Пештар аз ин шаби 30-юми июл ду ҳавопаймои бесарнишин ба Маҷмааи тиҷоратии “Маскав Сити” бархурда, тирезаҳои он шикаставу тахриб шуда буданд. Хабаргузориҳои Русия аз захмӣ шудани як нафар хабар дода буданд.
Вазорати дифои Русия дар баёнияе ҳодисаи шаби 30-юми июлро кӯшиши “ҳамлаи террористии нерӯҳои Украина” номида буд.
Украина то ҳол расман ҳеҷ ҳамлаеро ба душ нагирифтааст.
