Президенти Тоҷикистон қимати рутбаҳои низомӣ дар Тоҷикистонро барои кормандони мақомоти низомӣ ва интизомӣ кишвар арзон кард.
Бино ба иттилои расмӣ, субҳи имрӯз Эмомалӣ Рамҳон ба як қатор кормандони сохторҳои қудратии Тоҷикистон рубтаҳои нави ҳарбӣ дод.
Ба қавли манбаъ, Эмомалӣ Раҳмон ҳамчун Сарфармондеҳи олии Қувваҳои мусаллаҳи Тоҷикистон “як қатор хизматчиёни ҳарбии Вазорати мудофиа, Вазорати корҳои дохилӣ, Прокуратураи генералӣ, Агентии назорати давлатии молиявӣ ва мубориза бо коррупсияи Ҷумҳурии Тоҷикистон ва Кумитаи марказии ташкилоти ҷамъиятии мададгори мудофиаи Ҷумҳурии Тоҷикистонро бо рутбаи олии ҳарбии «генерал-майор» ва рутбаи дараҷавии «Мушовири давлатии адлияи дараҷаи 3» қадрдонӣ” кардааст.
Дар аксу наворҳои Хадамоти матбуоти Президенти Тоҷикистон нашр карда, дида мешавад, теъдоди онҳое, ки рутбаҳои нав гирифтаанд, 13 нафар мебошанд.
Гуфта мешавад, бо вуҷуди он, ки тибқи қонунгузориҳои кишвар ва қоидаҳои маъмул дар сохторҳои қудратӣ дарёфти рутбаҳои ҳарбӣ бар асоси кор ва фаъолиятҳои арзишманди кормандон дода мешавад, вале ба гуфтаи бархе шахсони наздик ба идораҳои давлатӣ, дар ҳукумати феълии Тоҷикистон дар хеле мавридҳо ин қонуну қоидаҳо бо пул ва додани ришва ҳаллу фасл мешаванд.
Ба гуфтаи бархе коршиносон, додани рутбаҳои низомӣ низ ба мисли мансабҳои давлатӣ дар ҳукумати Эмомалӣ Раҳмон нарх доранд ва ҳама хариду фурӯш мешаванд. Ба ҳамин хотир, онҳое зиёдтар ва тезтар аз дигар соҳиби рутбаҳои нав мешаванд, ки ё дар курсиҳои болоӣ касоне доранд, ки аз онҳо пуштибонӣ мекунанд ва ё пул дода онҳоро мехаранд.
