Шаби 8-ум ба 9-уми сентябри соли ҷорӣ заминларзаи шадиде қисмати ҷанубу ғарбии шаҳри Марокашро такон дод.
Бино ба иттилои мақомоти расмии ин кишвар, шиддати заминларза 7,2 ва дар баъзе минтақаҳо 6,8 дараҷаи Рехтерро ташкил додааст, ки хона ва иншооти зиёдеро дар ин шаҳр хароб кардааст.
Бино ба иттилои телевизиони давлатии Мағриб, то шаби шанбеи 9-уми сентябр адади кушташудаҳо ба 2012 ва захмиҳо ба 2059 нафар расида, вазъи саломатии беш аз 700 нафари дигар вазнин арзёбӣ шудааст. Мақомот мегӯянд, эҳтимол шумори қурбониён афзоиш меёбад.
Вазири адлияи Мағриб дар изҳороте ба “Ал-Ҷазира” гуфтааст, ки заминларза аз ҳама бештар дар минтақаи Ҳавзи Марокаш осеб расондааст. Ба гуфтаи ӯ, беш аз 1000 нафари ҷонбохтагон танҳо аз ҳамин минтақа будаанд.
Ин масъули мағрабӣ афзудааст, ки дар минтақаи мазкур баъзе деҳаҳо пурра хароб шуда, аз байн рафтаанд. Ва ҳамчунин бархе биноҳои таърихӣ, ки дар феҳристи ЮНЕСКО ворид шуда буданд, низ зарари ҷиддӣ дидаанд.
Дар пайи ин фоҷеаи бузург подошҳои Мағриб Муҳаммади VI 3 рӯз мотами миллӣ эълон карда ва фармон дод, ки парчамҳо аз биноҳои давлатӣ ба хотири эҳтироми қурбониён поин карда шаванд.
Мақомоти ин кишвар ҳамчунин аз тамоми шаҳрвандон талаб кардаанд, ки дар кумак расондан ба зарардидагон кумак кунанд ва ҳамчунин довталабона барои додани хун низ ба марказҳои тиббӣ бишитобанд.
