Ҳамлагари шинохтаи пуртуғолӣ ва бозигари бошгоҳи “Ал-Наср”-и Арабистони Саудӣ Криштиану Роналду ба Душанбе наомад.
Қарор буд ин бозигари шинохтаи ҷаҳонӣ барои бозӣ бо дастаи “Истиқлол”-и Тоҷикистон рӯзи 4-уми декабр ба Душанбе биёяд, аммо ӯ ташриф наовард.
Гуфта мешавад, имрӯз футболбозони бошгоҳи “Ал-Наср”-ро ҳаводорони тоҷикистонияшон дар Фурудгоҳи байнулмилалии Душанбе пешвоз гирифтанд.
Дар ҳайати “Ал-Наср” ситораҳои ҷаҳонии футбол, ба мисли Талиска, Садио Мане, Марсело Брозович ва дигарон бозӣ мекунанд, ки ҳама ба ҷуз Криштиано Роналду ба Тоҷикистон омаданд.
Сухангӯи бошгоҳи футболи “Истиқлол” Рустам Ҳакимов ба Радиои Озодӣ гуфтааст, ки “ба иттилои маъмурияти бошгоҳи “Ал-Наср”, капитани даста ва мунтахаби Португалия Криштиану Роналду, ки дар бозӣ муқобили “Персеполис”-и Эрон осеб дидааст ва феълан табобат мегирад, ба бозӣ бо “Истиқлол” ба Душанбе наомад.”
Криштино Роналду дар ҳоле ба Душанбе ташриф наовард, ки мухлисони футбол дар Тоҷикистон аз ҳама бештар мунтазири ӯ буданд ва мақомоти тоҷик ҳам бо истифода аз номи ӯ аксар чиптаҳо барои бозии “Истиқлол” ва “Ал-Наср”-ро бо нархҳои гарон (аз 100 то 3000 сомонӣ) фурӯхтаанд.
Гуфта мешавад, бозӣ миёни “Истиқлол” ва “Ал-Наср” фардо, 5-уми декабр дар Варзишгоҳи марказии Душанбе соати 21:00 оғоз меёбад.
Бояд қайд кард, ки ин бозӣ чизеро иваз намекунад, чун дар гурӯҳи “Е” дастаи “Ал-Наср” бо касби 13 имтиёз ба плей-офф роҳ ёфтааст, аммо “Истиқлол” аз ҳаққи идомаи мубориза дар даври баъдии мусобиқот маҳрум шудааст.
Бозии якуми ин ду бошгоҳ дар доираи марҳилаи гурӯҳии Лигаи қаҳрамонҳои AFC (Конфедератсияи футболи Осиё)-2023/24 рӯзи 2-юми октябр дар варзишгоҳи “Ал-Аввал Парк”-и шаҳри Риёз баргузор ва бо ҳисоби 3:1 ба нафъи “Ал-Наср” хотима ёфта буд.
