Вазорати корҳои хориҷии Австралия ба шаҳрвандонаш ҳушдор додааст, ки аз сафар ба Афғонистон ва бахусус, пойтахти ин кишвар шаҳри Кобул худдорӣ кунанд.
Бино ба иттилои расонаҳо, 5-уми декабри соли 2023 Вазорати корҳои хориҷии Австралия ба шаҳрвандонаш ҳушдор дода гуфтааст, ки ба Афғонистон сафар накунанд, зеро хатари ҳамлаҳои террористӣ вуҷуд дорад.
Ин вазорат гуфтааст, ки “хатари ҳамлаҳои террористии мудовим ва бисёр зиёд” дар Афғонистони таҳти султаи Толибон вуҷуд дорад.
Дар иттилоияи ин вазорат таъкид шуда, ки “террористҳо ба ҳадаф қарор додани хориҷиҳо, созмонҳои ғайри давлатӣ ва амалиётҳои башардӯстона идома медиҳанд. Шаҳрвандони хориҷӣ, аз ҷумла австралиягиҳо низ бо таҳдиди одамрабоӣ ё боздошт мувоҷиҳ ҳастанд.”
Гуфта мешавад, кишвари Австралия яке аз муттаҳидони Амрико дар ҷанги 20-солаи ИМА ва НАТО алайҳи Толибон буд. Пеш аз ин бархе сарбозони ин кишвар ба иртикоби ҷиноятҳои ҷангӣ дар Афғонистон муттаҳам шуда буданд.
Аммо акнун Австариля пас аз дубора сари қудрат омадани Толибон дар Афғонистон ҳеч ниҳоди амалкунандае, ки дипломатҳояш дар он ҷо фаъолият кунанд, надорад. Толибон ҳам то ҳол дар ин бора вокунише накардаанд.
