Ҳайтҳои корӣ ва топографии ҳукуматҳои Тоҷикистону Қирғизистон дар нишасти ахир ба таъйин ва аломатгузории 24,1 км хатти марз муваффақ шуданд.
Хабаргузории ҳукуматии “Ховар” дар истинод ба Кумитаи давлатии амнияти миллии Тоҷикистон хабар дод, ки ҳайатҳои корӣ ва топографии ҳукуматҳои Тоҷикистону Қирғизистон аз 29-уми ноябр то 5 декабри соли ҷорӣ дар шаҳри Бӯстони вилояти Суғд мулоқоти навбатии худро гузарониданд.
Гуфта мешавад, дар ин мулоқот ҷонибҳо дар мавриди муайянкунӣ ва аломатгузории 24,01 км марзи муштараки байни ду кишвари ҳамсоя ба мувофиқа расида, Протоколи навбатиро имзо карданд.
Аммо Кумитаи давлатии амнияти Тоҷикистон шарҳ надодааст, ки ин мувофиқа дақиқан кадом минтақа ва ё қитъаи баҳсии марзо дар бар мегирад. Дар хабар танҳо миқдори киломатри марзи мувофиқашуда зикр шудааст.
Дар иттилоияи қаблие, ки ҷониби Тоҷикистон нашр карда буд, бори аввал аст, ки баъзе ҷузъиёти музокира гуфта шуд. Аз ҷумла, Саймумин Ятимо, раиси КДАМ-и Тоҷикистон таъкид кард, ки бо ҳамтои қирғизаш ба тавофуқоти усулӣ даст ёфтаанд. Ӯ зикр кард, ки “Қирғизистон ба тамоми иншооте, ки дар қаламрави мо дорад, дастрасии доимӣ хоҳад дошт, вале қаламрав аз Ҷумҳурии Тоҷикистон боқӣ хоҳад монд. Тамоми иншооте, ки Ҷумҳурии Тоҷикистон дар қаламрави Ҷумҳурии Қирғизистон дорад, абадан ва доимо аз тарафи Тоҷикистон истифода мешаванд, вале заминҳо қаламрави Ҷумҳурии Қирғизистон боқӣ мемонад.”
Ҷониби Тоҷикистон аз рафти музокирот ва тавофуқоти ҳосилшуда ба расонаҳои тоҷик хабар намедиҳад. Ин дар ҳолест, ки ҷониби Қирғизистон ба расонаҳо каму беш аз раванди музокирот ва тавофуқоти ҳосилшуда иттилоъ медиҳад. Аз ҷумла, мақомоти Қирғизистон борҳо гуфтаанд, ки ба эҳтимоли зиёд то поёни соли 2023 масоили баҳсии марзро бо Тоҷикистон ҳал хоҳанд кард ва ба мувофиқаи ниҳоӣ хоҳанд расид.
Ёдовар мешавем, ки Тоҷикистон ва Қирғизистон бо ҳам 980 километр марзи муштарак доранд, ки то ин дам зиёда аз 600 километри он муайян шудааст. Давоми 2-3 соли ахир борҳо байни сокинони марзии ду кишвар бар сари нуқтаҳои аломатгузоринашудаи марз даргириҳо рух дод, ки дар натҷиа ин муноқишаҳо аз ду тараф даҳҳо кушта ва захмӣ ба ҷо гузошт.
